El FICX súmase a la promoción del talentu español incluyendo na so inauguración el curtiumetraxe La causa del accidente que provocó el incendio (España) dirixíu por Lope Serrano pa la productora CANADA. Al rodiu d’esta obra articúlase la campaña d’Audiovisual from Spain (ICEX) que lleva por nome «Spain, Where Talent Ignites» y que tien como oxetivu potenciar la visibilidá de la calidá audiovisual española nel esterior. El curtiumetraxe cunta con un elencu de lluxu compuestu por Bárbara Lennie, Berta Prieto y Omar Ayuso ya inclúi los cameos de los directores Albert Serra y J.A. Bayona.
La pieza va dar pasu a ¡Gloria! (Italia), llargumetraxe musical estrenáu na Berlinale nel que l’actriz y cantautora italiana Margherita Vicario debuta como directora y reivindica la memoria de les muyeres compositores a lo llargo de la hestoria. Faise nel contestu de Venecia nos alboreceres del sieglu XIX, onde una nueva criada del orfanatu y conservatoriu de San Ignacio va llevar a cabu un descubrimientu que va suponer una gran revolución vital y artística. El Festival va proyectar la película inaugural, que foi adquirida por Surtsey Films pa la so distribución n’España, en collaboración cola Dirección Xeneral d’Igualdá de Muyeres y Homes del Conceyu de Xixón.
Pela so parte, Silent Trilogy (Finlandia) de Juho Kuosmanen va ser el filme de clausura d’esta 62ª edición. Trátase de trés histories interconectaes nes que’l so director (galardonáu en Cannes, Locarno, Tampere y nos Premios del Cine Européu, y autor de la célebre Compartimento nº 6, nomada a un Globu d’Oru) retoma’l camín del so compatriota y amigu Aki Kaurismäki pa rindir homenaxe al cine mudu, coles mesmes que convida a repensar la nuesa relación cola imaxe más allá de la pallabra. Estrenada nel célebre y fundamental Cinema Ritrovato de Bolonia, Silent Trilogy supón una auténticu festín cinéfilu pa zarrar el 62 FICX.
