Les obres Venir de Marte, de Gonzalo Llamedo Pandiella; Panexíricos pa los qu’escaecieron volver, de Iyán Caldevilla, y Rambalín, d’Hugo Menéndez Montes, fueron galardonaes colos premios Asturies Nuevu nes sos modalidaes de poesía, narrativa y testos teatrales. Los autores van recibir 3.000 euros, amás de la publicación de les obres premiaes, de les cualos cada ganador va recibir 50 exemplares.
El xuráu destacó del poemariu Venir de Marte, de Gonzalo Llamedo “la escucha y unidá temática qu’afronta la identidá dende la memoria, el cuerpu y la resistencia”. De la narración de Iyán Caldevilla, Panexíricos pa los qu’escaecieron volver, resaltó “la prosa de peralta calidá que reivindica’l territoriu y la identidá, dándo-y una unidá temática énte la muerte”, y sobro la obra de teatru Rambalín, d’Hugo Menéndez, valoró “el desenvolvimientu progresivu del personaxe, marcáu dende lo emocional”.
Nesta edición el director xeneral de Mocedá, Francisco de Asiis Fernández Olanda, presidió’l xuráu, integráu pol director de la Escuela Cimera d’Arte Dramáticu del Principáu d’Asturies, Pedro Ignacio Ortega; la doctora n’Investigaciones Humanístiques pola Universidá d’Uviéu, María Fernández Abril, y l’escritor y director de la Selmana Negra de Xixón, Miguel Barrero.
Fernández Olanda destacó l’amplia participación nesta edición, na que se recibieron 19 obres de poesía, 10 de narrativa y 10 testos teatrales, 39 frente a les 11 rexistraes en total el pasáu exerciciu.
Al respective de los ganadores, el director xeneral aseguró que se caractericen pola coherencia y claridá espresiva, que toos ellos comparten al ser d’una xeneración fuerte, rica en cultura, comprometida col territoriu y con un sentimientu y un raciociniu bien fondiáu nel sentíu de los tiempos, y que tien ganes d’escribir coles sos manos y n’asturianu el futuru d’Asturies”.
