Llega la ponte de payares y el Conceyu de Gozón quixo entamar unos díes d’actividaes pa tolos públicos, onde’l platu fuerte va ser el VII Concursu de Calabaces. Les actividaes van dar empiezu’l vienres 28 d’ochobre cola procesión Samaín entamada pol CP La Canal que va dir dende’l centru hasta la Torre del Reló. El sábadu, el Magu Pelayo va anubrir de maxa Gozón col so espectáculu “Érase una vegada…una ilusión”. Pela tarde, los pequenos, de 3 a 12 años, van poder esfrutar de pintacaras, taller de mazcaritos, DJ y un Escape Room.
Al otru día, y de la mano de l’Asociación Cultural Fumañeda Santolaya y l’Asociación Fonte L’Ordoño llega Peñes Rural. Pela mañana va haber un mercáu y amuesa de la seronda (artesanía, productos de la güerta,…) y podrá conocese «La hestoria de los Vaqueros d’Alzada» y «Cómo les patates y el maíz quitaron la fame». Pela tarde, a partir de les 18 hores, Berto Álvarez va dar una charra sobre «Les Costumes D’animes».
Estes dos asociaciones tamién van entamar el Amagüestu y Esfoyaza el día 31 a partir de les 18 hores. Una hora más tarde va dar empiezu’l VII Concursu de Calabaces, hasta’l fallu de les ganadores, la Bandina “La Xarangana” va poner la nota musical al eventu.
Pa rematar la ponte en familia, el 2 de payares a partir de les 17 hores va haber xuegos tradicionales al cargu de la Asociación de Deportes Tradicionales 6Conceyos.
VII Concursu de Calabaces
L’eventu (gratuitu) va tener llugar el domingu 31 d’ochobre, a les 18.00 hores nel parque Zapardel de la villa. Les inscripciones podrán formalizase el mesmu día ente les 18.00 y les 20.00 hores nuna carpa instalada nel Parque Zapardel. Un xuráu integráu por personalidaes venceyaes a les artes y la cultura del conceyu va escoyer a les ganadores en trés categoríes: calabaza natural meyor tallada a mano, calabaza más orixinal y calabaza de mayor interés cultural. Anguaño’l públicu tamién va poder escoyer la so calabaza preferida por aciu votu directu nuna urna. El fallu va dar a conocer a les 20:30 hores.
