La Conseyería de Salú constató l’ameyoramientu de la situación epidemiolóxica de Grau, que va salir esta medianueche de la situación de máximu riesgu (4+) por coronavirus, tres 21 díes con midíes restrictives. Los técnicos de Salú Públicu comunicaron esti mediudía la decisión a los responsables municipales.
Les llimitaciones implantáronse nesti conceyu’l 26 de xineru. Al tratase d’un conceyu de menos de 10.000 habitantes, la so evaluación realizóse de manera individualizada. Nos dos últimos díes nun se diagnosticaron casos y na última selmana rexistráronse namá dos. Tampoco hubo nengún positivu en mayores de 65 años mientres los pasaos nueve díes.
138 nuevos casos
Salú confirma 138 nuevos casos de coronavirus detectaos ayeri, xornada na que se producieron 38 ingresos en planta y 4 en UCI, y rexistráronse 15 altes.
Anguaño, n’Asturies hai 537 pacientes hospitalizaos con confirmación o barruntu de covid-19 y otres 131 persones permanecen n’unidaes de cuidos intensivos.
Ayeri finaron cinco homes de 64, 70, 76, 84 y 87. Nenguna d’estes persones moraba nun centru sociosanitariu pa mayores.
El Serviciu de Salú del Principáu (Sespa) realizó’l domingu 2.983 pruebes y la tasa de positividad asitiar nel 6,13%.
Nestos momentos tán ocupaes el 60,42% de les 283 cames d’unidaes de críticos con respirador: un 46,29% por pacientes covid y un 14,13% por otres patoloxíes.
Al respective de los ingresos en planta, la ocupación total ye del 72,36%. Les hospitalizaciones por coronavirus suponen el 17% y un 55,37% correspuenden a pacientes con otres patoloxíes.
En relación cola ocupación n’otros centros convertíos pa l’atención a persones con covid-19, tán n’usu’l 19,70% del total de 264 cames habilitaes.
Recomendaciones pa frenar los contaxos
El gobiernu d’Asturies encamienta a la ciudadanía a rellacionase solo con convivientes, llindar al máximu l’actividá social y evitar el contactu con persones mayores o con patoloxíes cróniques si encaróse dalguna situación de riesgu. N’especial, apela a los habitantes d’Avilés, Corvera, Castrillón, Gozón, Uviéu, Cangas, Xixón, Mieres, Samartín del Rei Aurelio, L.lena, Grau, Ayer, Siero y Carreño énte la tresmisión comuñal del virus nestos conceyos, según naquellos otros nos que se vaiga declarando’l nivel de riesgu estremo (4+).
Les autoridaes sanitaries recuerden la importancia de permanecer en casa y aisllase de les persones coles que se convive énte l’apaición de síntomes compatibles cola covid-19 (fiebre súbito, tos o sensación de falta d’aire, perda d’olfatu y de gustu, dolores de gargüelu, musculares y torácicos, foria o cefalea). Coles mesmes, aconseyen llamar per teléfonu al centru de salú o al númberu d’atención 984 100 400.
Amás, insisten en que ye fundamental la responsabilidá individual de les persones que tán pendientes de la resultancia d’una PCR o que son consideraes contactos estrechos, quien han de permanecer nes sos cases, vixilar el so estáu de salú y cumplir puramente la cuarentena.
La Conseyería de Salú encamienta que los mayores de 65 años o con patoloxíes cróniques eviten espacios interiores, con mala ventilación y alta concentración de persones, sobremanera n’actividaes grupales de calter deportivu, lúdicu, social o relixosu.
Amás, les autoridaes sanitariu y educativu encamienten al alumnáu, especialmente a partir de 15 años, a acutar los contactos sociales pa frenar l’espardimientu del virus. Tamién aconseyen a les families la vixilancia activa del estáu de salú d’adolescentes y convivientes, sobremanera si estos postreros son mayores o tienen enfermedaes cróniques.
