La Conseyería de Cultura, Política Llingüística y Deporte anunció los finalistes de la edición 2025 del Premiu Camaretá al Meyor Cantar: Héctor Braga, Ferla Megía, Herbamora y Lïbre, toos ellos con trabayos difundíos nos meses previos a la convocatoria.
El xuráu, aconceyáu’l miércoles 18 de xunu, fixo la selección de les cuatro candidatures pa la final. El xuráu taba compuestu pola cantante Alicia Álvarez, el periodista Xicu Ariza, la técnica de normalización llingüística Penélope Miranda, la filóloga y gaitera Andrea Joglar, y la profesora Emma Posada.
L’aumentu de la participación y el fechu de que dalgunos de los artistes repitan supón, a xuiciu del xuráu, una señal de la consolidación del premiu y de la so utilidá pa los artistes que trabayen coles llingües propies de la nuestra comunidá. La variedá de propuestes tamién da cuenta de los caminos nuevos que ta abriendo la música asturiana.
El premiu, dotáu con 6.000 euros, ta convocáu pol Gobiernu del Principáu d’Asturies cola mira d’afianzar, prestixar y arriquecer la creación musical tanto n’asturianu como n’eonaviegu. Al premiu en metálico súmase la integración del artista ganador nel circuitu Autores nel Camín, col que se realicen actuaciones n’Asturies.
El sábadu 18 d’ochobre Xixón va volver acoyer la final del Premiu Camaretá al Meyor Cantar nel Teatru de la Llaboral, un gallardón que cumple la decimoséptima edición. Nesa gala, el mesmu xuráu va decidir cuála va ser la canción vencedora y La Bonturné, formación premiada na edición anterior col tema Odisea la nui, va ufiertar una actuación.
Los cuatro temes finalistes d’esta edición son:
- Héctor Braga, con Valiente. Ye un referente afianzáu de la música asturiana, con siete discos publicaos hasta’l momentu y abondos reconocimientos tanto poles sos creaciones musicales y ensayístiques como poles so interpretaciones.
- Ferla Megía, con Xatu. Esti artista creador d’atmósferes ye una de les voces más inquietes de la escena asturiana y bebe tanto de los soníos urbanos como de la música más tradicional. El cantar finalista forma parte del so últimu EP, Páxaros 01.
- Herbamora, con Eclipse total. Cinco pandereteres y cantantes componen esta formación nacida nel 2003 cola intención de dar un aire nuevo a la tradición de la pandereta. Ganadores d’esti premiu nel 2007, la canción finalista pertenez al so tercer trabayu discográficu, 286 Llunes.
- Lïbre, con L’ablugada. Formación creada de recién con miembros d’otres bandes (Mala Reputación, Misiva, Origen y Desakato), nel so primer EP, Ciudadano Lunar, esploren soníos variaos, dende la canción d’autor hasta el pop alternativu, ensin escaecer la so base rock.
