El ministru de Sanidá, Salvador Illa, anunció que’l procesu de vacunación frente a la COVID-19 va empezar n’España’l domingu 27 d’avientu. Amás, aseguró que les dosis van llegar el día 26 y que toles comunidaes autónomes van recibir al otru día les que-yos correspuenden acordies col repartu equitativu previstu.
Illa fixo fincapié en qu’esti importante pasu «danos esperanza porque significa’l principiu del fin de la pandemia» y recordó que, tal que taba previstu, va facer de forma coordinada en toa Europa. «Nun queremos esperar nin un solu día, queremos que’l procesu de vacunación entame lo primero posible. Si Europa alcordó qu’empiece ente’l 27 y el 29 n’España vamos facelo’l 27», indicó.
El ministru informó de que «va ser un númberu significativu de dosis el que llegue al nuesu país pero va ser un procesu progresivu y selmanal; vamos dir recibiendo dosis y partiéndoles ente les comunidaes autónomes, que van ser les que citen a les persones que tienen que ser vacunaes según los colectivos prioritarios establecíos na Estratexa de Vacunación». Salvador Illa fixo fincapié coles mesmes en que «va haber un númberu de dosis abonda pa tolos ciudadanos españoles».
