Coincidiendo col Día Internacional de les Biblioteques, l’Academia de la Llingua Asturiana (ALLA) asoleya la decisión tomada na so última Xunta Ordinaria, onde, a propuesta del Presidente Xosé Antón González Riaño, I’académicu de númberu Inaciu Galán foi nomáu responsable de la biblioteca de la institución, cargu acutáu a miembros de l’ALLA según l’artículu 26 de los sos estatutos.
L’académicu o académica al cargu de la biblioteca tien, acordies cola previsión estatutaria, el mandáu de coordinar el caltenimientu y la clasificación de la biblioteca y l’archivu de la institución, dando cuenta de les nueves incorporaciones y organizando la so disponibilidá. Anque esti cargu taba nos estatutos anteriores de l’ALLA, ye la primer vegada que se fai’l nomamientu d’un miembru nesta responsabilidá.
Aparéyase esta decisión col proyeutu presentáu, tamién na Xunta Ordinaria, por Inaciu Galán, que trata de llevar alantre’l que va ser el repositoriu o archivu dixital de la lliteratura asturiana, un espaciu d’atropamientu en llinia de materiales históricos a disposición del públicu xeneral y de profesionales del ámbitu de la investigación llingüística y lliteraria. Esti proyeutu quier da-y un mayor espardimientu a los trabayos enveredaos a la recuperación de testos históricos, a los que se van amestar, dixitalizaos, los materiales de la propia institución y del archivu personal del nuevu responsable de la biblioteca, asina como aquellos custodiaos por otres instituciones o particulares colos que se puedan llogar alcuerdos de collaboración.
