La Conseyería d’Empléu tramitó yá nueve de cada diez espedientes de regulación temporal d’empléu (ERTE) rellacionaos cola crisis sanitaria, hasta algamar los 10.847, lo que supón el 90,92% del total. Estes solicitúes afecten a 45.112 persones trabayadores. Dende’l 11 de marzu pasáu hasta ayeri, 28 d’abril, rexistráronse 11.930 ERTE n’Asturies.
Del total d’espedientes tramitaos, 10.431 (el 96,16%) correspuenden a ERTE por causes de fuerza mayor y afecten a 39.355 trabayadores. Otros 416 (3,84%) atribúyense a otres causes (económiques, técniques, granibles y organizativas) y afecten a 5.757 persones. La incidencia por sectores caltiense y los servicios concentren el mayor volume de regulaciones (9.680) y d’emplegaos afectaos (34.666). De siguío, asítiense la industria, la construcción, el sector primariu y, finalmente, otros espedientes nos que nun se determinó l’actividá.
Anticipu prestaciones por desempléu
Per otru llau, más de mediu millar de trabayadores afectaos por ERTE presentaron hasta agora solicitúes pa percibir anticipos de les prestaciones por esempléu a entidaes financieres. La Dirección Xeneral d’Empléu y la Dirección Xeneral de Finances validaron 415 pidimientos. Unes 350 persones roblaron yá les operaciones y percibieron los anticipos. La previsión ye que nos próximos díes formalícense’l restu d’estes solicitúes.
Estos anticipos enmárquense nel conveniu suscritu pola Conseyería d’Industria, Empléu y Promoción Económica y la Conseyería de Facienda con seis entidaes bancaries pa poner a disposición de trabayadores en situación de regulación préstamos ensin intereses pa cubrir la posible falta d’ingresos hasta que perciban la prestación por desempléu. Esti conveniu ye una de les diez midíes económiques anunciaes el 26 de marzu pol Gobiernu d’Asturies pa embrivir los efectos social y económicu derivaos de la crisis sanitaria.
