Industria yá tramitó cuasi’l 70 % de los ERTE vinculaos a la crisis del coronavirus

Dende'l 11 de marzu recibiéronse 10.685 solicitúes y revisáronse 7.302, qu'afecten a 28.114 trabayadores

0
550

La Conseyería d’Industria, Empléu y Promoción Económica tramitó yá 7.302 solicitúes d’espedientes de regulación temporal d’empléu (ERTE). Ye’l 68,33 % de les 10.685 presentaes por cuenta de la crisis del COVID-19. Según el Serviciu de Rellaciones Llaborales de la Dirección Xeneral d’Empléu, estos espedientes afecten a 28.114 trabayadores.

El director xeneral d’Empléu y Formación, Pedro Fernández-Raigoso, treslladó estos datos a los axentes sociales y económicos. Fízolo mientres la segunda xunta de la comisión de siguimientu impulsada pol Gobiernu asturianu p’analizar los ERTE provocaos pola crisis sanitaria. En concreto, les 10.685 solicitúes presentáronse dende’l 11 de marzu y hasta’l llunes 13 d’abril. Del total d’ERTE tramitaos, 7.154 (98 %) correspuenden a causes de fuerza mayor y afecten a 27.269 emplegaos. Otros 148 (2 %) atribúyense a otres causes (económiques, técniques, productives y organizatives) y afecten a 845 persones.

La Conseyería detectó una moderación na presentación d’espedientes na cabera selmana, al rexistrase una medría del 7,11 % nes solicitúes (+ 710). Xuben, eso sí, un 69,7 % los trabayadores afectaos (+11.550) pola tramitación d’espedientes d’empreses de mayor tamañu. Fernández-Raigoso destacó que la meyora nes cifres de tramitación d’espedientes débese “a la meyora de los procedimientos técnicos pa entainar la xestión de les solicitúes”.