Iniciativa pol Asturianu ta acabante d’abrir el formulariu d’inscripción pa una nueva edición del seminariu sobre la oficialidá qu’entama la organización y qu’esti añu va llevar el sotítulu ‘Entrín y non. Normalizar enantes de la oficialidá’. Les inscripciones pueden facese al traviés d’un formulariu na web de l’asociación de reivindicación llingüística.
El simposiu va tener llugar los díes 15 y 16 de marzu nel Edificiu Hestóricu de la Universidá d’Uviéu y va cuntar con diferentes ponencies, charres, meses redondes sobre la situación actual de la llingua asturiana, la realidá llingüística d’otres comunidaes con llingua propia y tamién la estrena d’un documental centráu nes posibilidaes que tien l’idioma en relación a les nueves teconoloxíes y a la intelixencia artificial.
Cola organización d’esti IV Seminariu: ‘Oficialidá. El camín constitucional de futuru pal asturianu. Entrín y non. Normalizar enantes de la oficialidá’, la entidá pretende faer llegar a la sociedá civil la necesidá de llogar la declaración d’oficialidá pa les llingües propies d’Asturies y l’importante papel que tienen les nueves tecnoloxíes na normalización social del idioma y de la so supervivencia.
