L’afayu d’una serie de cintes inédites lleva a Juan Carlos Pérez, líder del icónicu grupu Itoiz, a reflexonar sobre la disolución de la banda nel so momentu más cimeru, tres un claru cambéu d’estilu escontra’l pop del qu’inda anguaño reniega. Juan Carlos va empecipiar asina un viaxe catárticu a la esencia del grupu, reviviendo los empiezos de la banda como un grupu de rock progresivu nel Mutriku nos años 70, que lo va sirvir pa reconciliase col pasáu.
D’esta manera presenta Doxa Producciones una película qu’engancha dende l’entamu colos primeros acordes d’una grabación en directu de la banda Itoitz. Mientres poco más d’hora y media, Larraitz Zuazo, directora de la obra, viaxa ensin interferir nel redescubrimientu de la música que tiempu atrás fixera la banda euskaldun, al traviés del so cantante, Juan Carlos, retrocediendo inclusive hasta’l so empiezu nel coru eclesiásticu de Mutriku.
Itoiz udako sesioak ye una oda a la señaldá musical, un cantar (nunca meyor dicho) a un tiempu pasáu que remató nel momentu qu’había facelo, «con un proyectu consolidáu y que nun tenía más percorríu», en pallabres del so vocalista. Cola tranquilidá que caracteriza a la película, destaca’l contraste del ritmu de los cantares cola calma del filu narrativu, señal d’un cuidu especial en cuntar les coses como talamente asocedieron. Cuando ves Itoiz udako sesioak pide que nun s’acabe y como remata la obra, pedir otra.
