La coalición d’Izquierda Xunida, Más País y IAS propón recuperar l’espíritu d’una alministración municipal atenta, tresparente y comprometida cola ciudadanía y la defensa de los sos derechos por aciu la puesta en marcha de la Oficina de Derechos de la Ciudadanía.
Noelia Ordieres, candidata númberu dos d’IX – Más País – IAS, presentó la propuesta pa recuperar esta dependencia municipal creada a entamos de los 90, mientres la mesa y
l’alderique Polítiques municipales pa la meyora de la calidá de la muerte entamáu pola asociación Derechu a Morrer Dignamente, DMD – Asturies, nel Centru Municipal
Integráu d’El Coto. “Retomamos esa iniciativa, sofitada nel so momentu por IX, pa da-y un nuevu impulsu coles mires de dotar a los y les ciudadanes de Xixón d’un serviciu d’orientación, espardimientu y divulgación de los nuevos derechos como los qu’entiende les lleis d’eutanasia y de muerte digna”, espunxo Ordieres.
Noelia Ordieres, trabayadora social y asesora del Conseyu Xeneral del Trabayu Social en
materia de la Llei d’Eutanasia con más d’una década d’esperiencia na investigación d’esta temática destacó que, “ye necesariu impulsar la conocencia d’estes lleis, según el documentu d’instrucciones previes, ferramientes fundamentales a la de garantizar una muerte digna na nuesa ciudá”.
La candidata númberu 2 de la coalición considera qu’esti serviciu va ser tamién d’utilidá pa la población en cuestiones rutinaries rellacionaes cola alministración municipal o autonómica, como la nueva llei de vivienda; o pa informar a persones migrantes y solicitantes d’asilu que moren na ciudá. Pa cumplir con estos oxetivos, la propuesta inclúi la creación d’aliances estratéxiques con organizaciones especializaes na defensa de los derechos de les persones por aciu el llanzamientu de campañes conxuntes pa sopelexar los servicios disponibles al traviés de la oficina municipal.
Amás, plantégase la collaboración cola Facultá de Trabayu Social y les clíniques xurídiques de la Facultá de Derechu pa impulsar la formación del estudiantáu na conocencia de los
derechos de la ciudadanía.
