El voceru municipal d’Izquierda Xunida – Más País – Izquierda Asturiana nel Conceyu de Xixón, Javier Suárez Llana, va llevar al Plenu ordinariu del próximu 13 de payares una iniciativa p’ampliar la moratoria de les viviendes d’usu turísticu a tol conceyu dempués de que “los datos publicaos estes selmanes confirmaren lo qu’alvertimos que pasaría: que llindar la moratoria a trés barrios de la ciudá nun diba acabar col problema, diba treslladalu”.
Asina, Suárez Llana esplica que “yá colos datos que facilitó’l gobiernu en xunetu pudimos ver cómo la restricción de nueves VUT en Cimavilla, L’Arena y el Centru taba provocando qu’abondaren nos barrios estremeros a la zona d’esclusión, como Ciares, Laviada, El Natahoyo… o inclusive El Llano, y esmoleznos especialmente’l desplazamientu de VUT a barrios obreros porque provoquen una xubida de precios del arriendu de vivienda en zones nes que la relación ente la renta de les families y lo que paguen pola vivienda ye yá un problema”.
A los problemes nel accesu a la vivienda’l conceyal d’IX suma tamién “l’impactu que les
VUT tienen n’actividaes económiques como la hotelería o’l comerciu local, actividaes que sí paguen impuestos y xeneren empléu. Nun ye una bona noticia que’l númberu de places de viviendes d’usu turísticu supere yá al de places hoteleres, nin que cierren comercios de proximidá o negocios locales y abran franquicies. Por muncho que’l gobiernu fale de turismu sostenible, el modelu de desenvolvimientu del sector en Xixón nun lo ye”.
Por tollo, Suárez Llana considera que “ye urxente que se paralice la concesión de comunicaciones ambientales a nueves viviendes d’usu turísticu en tol conceyu” y que “se meyora nes midíes regulatories, tanto urbanístiques como fiscales. Nun basta con sentase a esperar quedándose de brazos cruciaos como lleva faciendo’l gobiernu dende xineru. Nin una VUT más en Xixón hasta que nun haya una regulación”. Nesti sentíu, el voceru d’IX esplica que “la tramitación de les ordenances fiscales foi xuna oportunidá perdida na que’l
gobiernu nun tomó nenguna midida, al contrariu: casi nos cola una rebaxa na única tasa municipal que paguen les VUT”.
Suárez Llana llamenta tamién que “en diez meses, desque s’aprobó la moratoria, nun s’avanzó nada nel cambéu de la normativa urbanística pa que’l Conceyu cunte con preseos que-y dexen llindar les viviendes d’usu turísticu, como propunxo IX nos Plenos de setiembre de 2023 y xineru de 2024. El gobiernu tien que dexar de remar a favor de la turistificación de la ciudá y empezar a trabayar de verdá nun modelu turísticu que seya compatible cola vida de los vecinos”, conclúi.
