La conceyala del Grupu Municipal d’IX-MP-IAS, Noelia Ordieres, realizó una visita al Colexu Públicu Alfonso Camín de Roces en compañía de representantes del equipu directivu del centru y del AMPA, coles mires de conocer les reivindicaciones del centru educativu en materia d’inversión y reformes. Mientres el percorríu, la conceyala pudo comprobar los problemes qu’afecten al edificiu, dende mugores y desconchones a lo llargo de la fachada hasta furacos ensin cerrar d’obres anteriores que xeneren ciertu riesgu para la seguridá de los y les escolares. Per otru llau, tamién demanden meyores na barandiella del patiu, el suelu del ximnasiu o l’acondicionamientu pa facilitar l’accesibilidá del centru al alumnáu con discapacidá.
Ordieres señala que «l’Alfonso Camín da serviciu non yá a Roces sinón a la zona rural, dando serviciu a más de 400 families y rescampla que precisa una reforma integral, na que’l Conceyu y el Principáu tienen de responder y cooperar de manera conxunta, escuchando a la comunidá educativa. Nun podemos xugar cola salú de los nuesos fíos y fíes y pa ello ye necesariu curiar lo público, reflexando un compromisu presupuestariu que na actualidá ye insuficiente y un plan d’actuación consensuáu colos centros».
Dende Izquierda Xunida van alzar estes demandes a los sos compañeros del grupu parlamentariu na Xunta Xeneral del Principáu, según a la Comisión d’Urbanismu y Obres Públiques del Conceyu.
