El Grupu Municipal d’Izquierda Xunida- Más País- IZquierda Asturiana amosó la so condena y refugu énte l’acción llevada a cabu’l pasáu miércoles 1 de payares per parte del grupúsculo neonazi ‘Hacer Nación Asturias’ nel Hotel Begoña. Miembros d’esta organización
esplegaron una pancarta nuna de les habitaciones del inmueble hoteleru col lema ‘Frente a la invasión: Remigración’.
La concejala d’IX, Noelia Ordieres, manifestó que la so fuerza política «nun puede quedar callada énte estes acciones. Los representantes públicos nun podemos tolerar estos actos y tenemos la obligación de combatir discursos xenófobos y d’odiu». Dende Izquierda Xunida denuncien que se crució una llinia colorada acosando al colectivu de migrantes que s’atopen acoyíos nel hotel hasta la Navidá, pa Ordieres «púnxose en peligru la integridá física d’estes persones, según la seguridá de los usuarios y usuaries del hotel, hai llendes que nun se pueden cruciar y vamos pidir énte la Comisión de Seguridá Ciudadana que s’adopten les midíes necesaries por que situaciones asina nun vuelvan asoceder», dende’l so puntu de vista «amás del acoso hai un claru incitación al odiu escontra los migrantes, persones que llegaron equí fuxendo de situaciones bien difíciles nos sos países d’orixe, arriesgando la so vida, nuna situación de vulnerabilidá estrema. Xixón siempres foi una ciudá tolerante, solidaria, abierta y atopadiza. Si sobra daquién nesta ciudá ye la minoría racista y xenófoba’»
A lo último, la conceyala de la coalición manifestó que «estes actitúes d’odiu vense sofitaes pol discursu incendiariu ya irresponsable que lleva sosteniendo y alimentando mientres selmanes la conceyala y diputada de la ultraderecha Sara Álvarez Rouco y nesti sentíu, dende IX tamién amosemos la nuesa solidaridá col voluntariáu y profesionales que tán atendiendo a les persones migrantes y que son víctimes de la campaña d’acoso mediáticu».
