El voceru municipal d’Izquierda Xunida – Más País – Izquierda Asturiana, Javier Suárez Llana, va pidir güei na Comisión de Cultura, Deportes, Festexos y Servicios Sociales que’l Gobiernu municipal acometa meyores nel circuitu de footing El Kilometrín de manera que se ponga fin al abandonu nel que s’atopa esti equipamientu deportivu”. Suárez Llana recuerda tratar de circuitu que “pol so allugamientu, trazáu y equipamientos anexos ye escoyíu como llugar d’entrenamientu tanto por atletes profesionales como por corredores aficionaos”, y que magar de les socesives obres ya intervenciones realizaes a lo llargo de los años, “son repitíes les quexes de los usuarios”.
En concretu, el conceyal d’IX-MP-IAS señala la necesidá de revisar el firme del circuitu, “que perdió la capa superficial de material qu’ayuda a modular la so durez y evita que s’esprendan piedres, y que rique tamién meyores nel sistema de drenaxe pa que nun se formen charcos los díes d’agua”. Amás, “ye necesariu ameyorar la lluz de tol circuitu. Hai corredores que yá nun cuerren peles tardes pola falta de lluz”, enfea. Nel ruegu rexistráu que se va aldericar na Comisión de mañana, Suárez Llana pide tamién anovar la zona d’estiramientos y exercicios, “sustituyendo los actuales por un parque de calistenia”, mesmo que camudar les casetes que el corredores utilicen pa camudase por un modelu más ampliu y afayadizu pa esti usu, dotándoles de bancos y taquilles. Les casetes actuales -critica’l conceyal- tán cayéndose, lliteralmente, a cachos pol podrén de la madera”.
“Lo que pidimos, a la fin, ye que se ponga fin al abandonu d’un equipamientu nel que cientos de xixoneses practiquen deporte popular. Si’l caltenimientu fuera l’afayadizu a lo llargo de los años, nun taríamos nel puntu nel que tamos. Agora amás de caltenimientu faen falta inversiones”, conclúi.
