El voceru municipal d’Izquierda Xunida – Más País – Izquierda Asturiana nel Conceyu de Xixón, Javier Suárez Llana, esixó esta mañana al gobiernu local qu’incorpore al proyectu de presupuestos pa 2025 la compra de la finca de La Isla tres l’ultimátum unviáu pola propiedá al Consistoriu. Suárez Llana defende asina “priorizar la compra de La Isla frente a otres inversiones”, al tratase de “una pieza clave pa l’ampliación del Xardín Botánicu a la que Xixón nun puede arrenunciar”.
El conceyal d’IX considera “una irresponsabilidá” que’l gobiernu “nun cerrara un alcuerdu que lleva meses anunciando y pal que cunta col sofitu de tolos grupos políticos” y enfea al conceyal d’Urbanismu “dicinos que taben nello cuando la última vegada que falaron cola propiedá foi n’abril, va cinco meses”. Suárez Llana recuerda que la negociación pa l’alquisición de La Isla empecipióla’l gobiernu anterior y señala que “agora apura entá más incorporala al Botánicu en refugando l’actual gobiernu’l proyectu pa convertir la Quintana de Rionda nel nuevu llaboratoriu. Precisamos con urxencia un llugar afayadizu y seguru p’allugar el bancu de xermoplasma, los herbarios y l’actividá científica que se desenvuelve nel xardín”.
Pal voceru d’IX, si por daqué se caracteriza la xestión de Foro al frente del Botánicu ye por nun tener nengún proyectu seriu más allá de que vuelva ser el xardín de fiestes de Martínez Salvador. Con Foro dirixiendo’l xardín vuelve l’arrenunciu a proyectos que son clave pa la so ampliación y desenvolvimientu: en 2011 arrenunció al invernaderu pal bioma tropical, en 2023 al nuevu llaboratoriu na Quintana de Rionda. Esperamos que’l próximu arrenunciu nun seya la finca de La Isla”, conclúi’l conceyal.
