El voceru municipal d’Izquierda Xunida nel Conceyu de Xixón, Javier Suárez Llana, calificó esta mañana como “operación netamente privada” el Plan Llave presentáu pola alcaldesa Carmen Moriyón, “col que nun busca garantizar l’accesu a la vivienda sinón asegurar negociu a los promotores privaos per aciu la venta de suelu públicu municipal”.
Suárez Llana llamenta que “en cuenta d’apostar por polítiques qu’aumenten el parque municipal de vivienda pública, garanticen arriendos afayadizos y contribuyan a baxar precios, Foro opte por vender suelu públicu pa construyir viviendes que van ser vendíes a precios similares a los del mercáu llibre. El Plan Llave de Moriyón nun soluciona’l problema: ye un negociu, non una política pública”.
“Si se trata de facilitar l’accesu a la vivienda, nun sirve construyir viviendes en cualquier sitiu y so cualquier fórmula”, esplica’l conceyal d’IX, que recuerda que la Conseyería d’Ordenación del Territoriu, Urbanismu y Vivienda ta desenvolviendo un estudiu sobro la situación de la vivienda en Xixón que va sirvir de ferramienta pa planiar les actuaciones en materia de vivienda pública y les zones nes que son necesaries. “¿Por qué se va a promover la construcción de vivienda en suelu públicu en Ciares o El Cotu y non na zona oeste?”, pregunta Suárez Llana, que defende que “les polítiques de vivienda precisen planificación, y la propuesta de Foru escarez d’ella. Tamos una vegada más ante un tresvase de recursos de lo público a lo privao; neso consiste’l plan del gobiernu”.
Nesti sentíu, el voceru d’IX pregúntase tamién en qué va a reinvertir el Conceyu’l dineru llográu cola venta de suelu públicu, habida cuenta de que la normativa obliga a facelo nel mesmu patrimoniu municipal de suelu o, nesti casu, en vivienda pública. “Lo que preguntamos ye si esto ye una xugada de Monopoly de Moriyón pa consiguir el dineru que nun tien pa mercar los terrenes de PYMAR n’El Natahoyo”.
Frente a la propuesta de Foro, Suárez Llana defende la necesidá de que’l Conceyu ponga suelu municipal a disposición d’actuaciones públiques p’arriendu afayadizu qu’incidan nel mercáu de la vivienda y contribuyan a baxar los precios. Tamién que “frente a la collaboración públicu-privada, se busquen alternatives de collaboración públicu-comuñal, como ye’l casu de les cooperatives de vivienda, qu’en Xixón sirvieron va décades pa facilitar l’accesu a la vivienda en munchos barrios, o les nueves fórmules de vivienda colaborativa como’l cohousing”.
El voceru d’IX apuesta por potenciar el papel de la Empresa Municipal de la Vivienda, que “tien de convertise nuna promotora de vivienda pública y nuna ferramienta más eficaz pa movilizar vivienda vacía”.
