El voceru municipal d’Izquierda Xunida – Más País – Esquierda Asturiana nel Conceyu de Xixón, Javier Suárez Llana, criticó esta mañana la posición del PSOE sobro’l ríu Piles porque “anteponen un interés particular frente al interés xeneral de la ciudá. El PSOE tien d’esplicar los y les xixoneses por qué ente protexer el ríu y la sablera o protexer a un club priváu escueyen lo segundo, y a qué intereses respuende esa posición”, esplica’l conceyal, pa quien resulta “frustrante que dempués de cuatro años nun entendieren que cálceres y estancamientu impliquen agües puerques nel ríu y na sablera”.
Suárez Llana considera “xuna irresponsabilidá” que’l partíu que gobernó en Xixón mientres el pasáu mandatu, y que “conoz en fondura” el proyectu de renaturalización del Piles, “desmárquese precisamente agora, cuando s’estudien alternatives pal piragüismu n’otros espacios de la ciudá, y plantegue otra vuelta tras cola recuperación del mesmu aniellu navegable nel que cuando los neños cayíen al agua activábase un protocolu de desinfección. Si güei tenemos una sovención europea pa recuperar ambientalmente’l ríu ye fundamentalmente porque tomamos la decisión de desaniciar les torgues qu’impedíen al
agua circular llibremente. Eso ye lo que se valoraba na sovención, la eliminación de torgues. Y eso ye xustu lo contrario de lo que propón el PSOE agora”.
“Tenemos un PSOE en Xixón que se dedica a facer oposición a proyectos que fueron aprobaos mientres el pasáu mandatu, por un gobiernu con alcaldía socialista, en cuenta de reivindicalos”, llamentó’l conceyal, que destaca qu’anque’l proyectu de renaturalización del Piles foi lideráu por IX “hubo munches compañeres y compañeros del PSOE que creyeron nel proyectu y trabayaron y engarraron pa que la sovención de casi 3 millones d’euros de fondos europeos pa desenvolvelo fuera una realidá”.
El voceru d’IX-MP-IAS calificó de “debaláu” l’aldu de los socialistes xixoneses y recordólu que “a quien tienen que facer oposición nun ye al gobiernu d’izquierdes que presidió Ana González, que yá nun ta, sinón al gobiernu de dereches que preside agora Carmen
Moriyón”.
