El voceru municipal d’Izquierda Xunida, Javier Suárez Llana, denunció esta mañana “el procesu de mercantilización col que’l Gobiernu local ta camudando’l modelu de fiestes populares de la nuesa ciudá” tres l’anunciu realizáu por Divertia relativu a la instalación de quince casetes hosteleres y una gran terraza nel Paséu de Begoña mientres la Selmana Grande.
Pa Suárez Llana, “tamos asistiendo en directu a la mercantilización y la privatización del espaciu públicu, un procesu que respuende perfectamente al modelu de la derecha: poner lo público, lo de toos, al serviciu d’unos pocos. Agora toca la Selmana Grande y toca’l Paséu de Begoña pa favorecer los intereses de OTEA, pero nun se trata d’un casu aislláu si non d’un enfotu constante por mercantilizar tola programación cultural y d’ociu de la ciudá. Ye un cambéu de modelu qu’utiliza recursos públicos pa favorecer intereses privaos”. Nel casu de les casetes de Begoña, el conceyal d’IX critica que “les decisiones tán tomándose d’espaldes a la ciudadanía, con un procesu que nun ta siendo tresparente nin tien en cuenta la opinión de los vecinos y los hosteleros de la zona”. Amás, Suárez Llana cuestiona que “instalar mientres doce hores al día casetes y una gran terraza con música y consumu de bébores alcohóliques al llau d’un parque infantil seya la meyor de les idees”, anque reconoz que va en sintonía cola decisión de roblar un patrociniu pa los festexos de la ciudá con una marca de bébores alcohóliques. “Tamos -añede- énte otru exemplu de les polítiques de Foro y PP, pensaes más pal turismu de fin de selmana que pa les vecines y los vecinos”.
Dende IX, consideren urxente repensar el modelu de festexos de la ciudá y apostar por potenciar y favorecer les iniciatives populares que “crean comunidá, promueven la participación y apurren diversidá ya identidá a la ciudá y los barrios frente al modelu de festexu franquicia que ta poniendo la derecha llocal”.
Nesti sentíu, Suárez Llana critica la perda d’iniciativa y de lideralgu del Conceyu, ye dicir
de lo público, na programación cultural y festiva, al optar por un modelu de esternalización
d’actividaes y eventos al traviés de contratos municipales que se caractericen, amás, pola so poca tresparencia”.
