El voceru municipal d’Izquierda Xunida – Más País – Izquierda Asturiana, Javier Suárez Llana, va pidir na Comisión d’Urbanismu, Obres Públiques y Mediu Ambiente del próximu vienres que’l Conceyu arrenuncie a utilizar material pirotécnicu como métodu pa echar
estorninos nel parque de Sabel la Católica dientro de los trabayos de control de los dormideros que realiza la conceyalía de Mediu Ambiente y Sostenibilidá.
Suárez Llana, que va plantegar el pidimientu tres les reclamaciones recibíes dende colectivos vecinales y ecoloxistes, recuerda que’l plan d’usu y xestión del parque d’Isabel la Católica, aprobáu en 2018, “otorga una especial protección a les aves migratories, ya incide na necesidá de desenvolver actuaciones por que los estanques del parque sigan siendo un
referente n’especies d’aves invernantes”.
“De fechu – esplica’l conceyal –, el plan establez ente los sos oxetivos el d’evitar actuaciones que puedan tener un impactu negativu na fauna, y fai especial incidencia nel ruiu. Non solo declara’l parque como zona sele, sinón que prohibe producir ruios a mayor nivel sonoru de lo tolerable pola fauna”. Por ello, a Suárez Llana esmolez-y que’l Conceyu tea utilizando material pirotécnicu pa estornar estorninos nuna zona de recepción d’aves migratories como ye’l parque de Sabel la Católica, que cunta amás con un plan d’usu y xestión que protexe la fauna y prohibe esti tipu d’actuaciones. Non solo esisten métodos menos agresivos, que s’utilicen de fechu nel restu de la ciudá, sinón qu’amás tamos falando d’una zona rexistrada como Parque Zoolóxicu Aviario, polo que nun entendemos que s’echen los dormideros de los estorninos. Les molesties de ruiu y suciedá que causen a los vecinos en zones más próximes a edificios, como la cai Cuadonga o la plazuela San Miguel, nun se producen nel parque”, conclúi.
