El voceru municipal d’Izquierda Xunida – Más País – Izquierda Asturiana, Javier Suárez Llana, pidió que los fondos europeos consiguíos pa estender la rede ciclista de la ciudá s’utilicen dando prioridá a les conexones con contornes escolares y cola Milla del Conocimiento.
En concretu, la formación de Suárez Llanu apuesta por sumar nuevos kilómetros de carril bici, de primeres, completando la esistente na avenida Albert Einstein, dende la rotonda na que s’alluga la Escultura escontra la lluz” hasta’l entronque cola sienda fluvial en Viesques. “Son apenes unos 400 metros que dexaríen tener una conexón segura y directa ente la ciudá, el Campus Universitariu y tola contorna de la Milla del Conocimiento”, esplica’l conceyal, pa quien “unir una zona na que se concentren la Universidá, el Parque Científicu Tecnolóxicu, el Xardín Botánicu, l’Hospital de Cabueñes o La Llaboral cola ciudá debería de ser una prioridá”.
De segundes, Suárez Llana pide que se tengan en cuenta les contornes escolares a la de priorizar los carriles bici a executar, “de manera que se xeneren conexones ciclistes ente los colexos y la rede yá esistente pa fomentar la movilidá en bici nel ámbitu escolar”. Nesti sentíu, dende Izquierda Xunida propónse dar una solución al CP Ríu Piles y el IES El Piles, “dos de los centros educativos nos que más alumnáu utiliza la bici a diariu a pesar de nun esistir una conexón ciclista segura”. El conceyal esplica que “nesti casu, conectar los dos centros con el carril bici que trescurre na marxe esquierda del ríu nun paez que seya una actuación nin bien complexa nin bien costosa, y ameyoraría enforma la seguridá vial del alumnáu”.
Amás, dende IX propónse actuar n’otra redolada escolar, el de La Escuelona, nel qu’aportuna n’aprovechar l’actuación de pacificación anunciada en La Serena pa crear una conexón ciclista esti oeste al traviés de la cai Eleuterio Quintanilla. “Non solo daría serviciu al colexu, sinón que sirviría pa xunir los carriles bici de l’avenida de la Constitución col de l’avenida d’El Llano, coles mires d’avanzar nel zarru de la malla ciclista de la ciudá. Nun entendemos qu’una vegada decidío actuar na zona esbardie esta oportunidá”. Trátase, nos trés casos, d’actuaciones que vienen recoyíes nel Plan de Movilidá Sostenible “y que colectivos como Asturies ConBici o l’Observatoriu Xixónes de Movilidá señalaron mientres los últimos meses como prioritaries frente a otres anunciaes pol Gobiernu municipal, como la del carril bici del Polígonu”, esplica Suárez Llana, que va llevar l’asuntu a la Comisión d’Urbanismu, Obres Públiques y Mediu Ambiente del próximu vienres. “El tiempu pasa y n’avientu tienen que tar executaos 2,5 km de carril bici con cargu a fondos europeos, pa los que se dispon de 558.000 euros. Queremos saber si amás del de Poniente, el Gobiernu tien previstu atender dalguna de les demandes de los colectivos ciclistes de la ciudá”.
