El voceru municipal d’Izquierda Xunida – Más País – Izquierda Asturiana, Javier Suárez Llana, va pidir na próxima Comisión de Seguridá Ciudadana, Tráficu y Participación Ciudadana la creación d’una rede d’aparcamientos seguros pa bicicletes coles mires de favorecer que la movilidá ciclista “seya realmente una manera de desplazamientu cotidianu na nuesa ciudá”.
Suárez Llana esplica que “la insuficiencia d’aparcamientu (15,5%) y el riesgu de robu (21,1%) son dos de les principales dificultaes pa movese en bicicleta pela ciudá”, según conclúi l’últimu Barómetru de la Bicicleta n’España, publicáu en xunetu de 2022. La última encuesta realizada pol Ministeriu de Tresportes, Movilidá y Axenda Urbana, nel marcu del Diálogu Abiertu de Movilidá, “asitia tamién la esistencia d’aparcamientos seguros en destín, xunto a la meyora de la seguridá vial, como’l principal motivu de mano a usar la bicicleta na ciudá”.
“Sicasí, a diferencia de lo qu’asocede en ciudaes como Barcelona, Murcia, Zaragoza o Madrid, Xixón nun cunta güei con nengún aparcamientu seguru pa bicicletes”, señala’l conceyal, “y la previsión ye que los primeros nun vaigan instalase a iniciativa del Conceyu, sinón d’ADIF na estación de Sanz Crespo y d’Asturies nel intercambiador de L’Humedal”, llamenta. Poro, IX-MP-IAS propón crear “una rede d’aparcamientos seguros pa bicicletes empobinaos a estacionamientos de llarga duración que dexen amás favorecer la intermodalidá con otros medios de movilidá. Queremos que’l mieu al robu o la falta d’aparcamientos dexen de ser un elementu de disuasión pa usar la bicicleta como manera de movenos nel nuesu día a día”, esplica Suárez Llana, qu’apunta como requisitos pa esti tipu d’aparcamientos que seyan “instalaciones zarraes y cubiertes, accesibles y de bon usu, con control d’accesu al traviés d’una APP y allugaes en puntos estratéxicos de la rede ciclista y en nodos intermodales”.
