Izquierda Xunida quier que’l Conceyu de Xixón adopte midíes que pongan frenu a la proliferación de viviendes d’usu turísticu na ciudá, una actividá económica que la coalición
considera “desenfranada” y qu’empieza a xenerar problemes en barrios como Cimavilla, L’Arena o’l Centru. Pa ello, el so voceru municipal, Javier Suárez Llana, va presentar nel Plenu del próximu 13 de setiembre una proposición d’alcuerdu que busca impulsar un cambéu de la normativa urbanística que sirva pa establecer llendes al usu turísticu de la vivienda en Xixón.
El conceyal d’IX-MP-IAS esplica que “la proliferación de viviendes d’usu turísticu y viviendes
vacacionales qu’esperimentó la ciudá nos últimos años, y de manera acelerada tres la pandemia, ta teniendo impactu directu nel mercáu del alquiler residencial, amenorgando la ufierta y contribuyendo a alzar los precios”. Una situación qu’esmolez a IX-MP-IAS especialmente en barrios tensionaos como Cimavilla, L’Arena y el Centru, nos que “el procesu de turistificación ye yá evidente y cuérrese el riesgu de que la presión inmobiliaria y la xubida de precios acabe espulsando a los vecinos del barriu”.
Poro, Suárez Llana valora positivamente la intención anunciada pol conseyeru d’Ordenación
del Territoriu, Urbanismu, Vivienda y Derechos Ciudadanos, Ovidio Zapico, d’establecer una regulación más restrictiva de les viviendes d’usu turísticu n’Asturies, y considera que’l Conceyu de Xixón “debe tamién avanzar nesi camín, de manera coordinada col Gobiernu d’Asturies, aprovechando cada alministración los preseos colos que cunta”.
Nesti sentíu, el voceru d’IX-MP-IAS va proponer al Plenu una cambéu de la normativa urbanística qu’estableza llendes a la instalación de viviendes d’usu turísticu. En concretu, la coalición pretende que’l Conceyu cunte con una regulación que dexe llendar el númberu de viviendes d’usu turísticu, “de manera que’l númberu d’esti tipu d’establecimientos nun pueda suponer nunca un porcentaxe eleváu respectu al númberu de viviendes d’usu residencial”.
Amás, IX-MP-IAS quier que la normativa afite tamién topes per edificiu, ya inclusive que llende esta actividá a les primeres plantes de los inmuebles. El voceru d’IX-MP-IAS esplica que “conceyos como los de Toledo o Bilbo yá aprobaron normatives similares, modificando’l planiamientu urbanísticu” y destaca que “el casu de Bilbo ye especialmente interesante porque actuó primero nel cascu históricu, que cunta con un Plan Especial, y agora tán trabayando nuna regulación pa tola ciudá al traviés del cambéu del Plan Xeneral”.
Y esi ye precisamente’l planteamientu qu’IX-MP-IAS va defender nel Plenu del próximu mes: una regulación en dos fases, con una primer a manera d’esperiencia piloto que se centre nel barriu de Cimavilla, y una segunda qu’estienda la norma al conxuntu de Xixón.
