Ilegales, la banda xixoniega probablemente con más ésitu a lo llargo de los años, asoleyó’l vienres pasáu «Joven y arrogante», un trabayu d’estudiu nuevu onde la esencia del grupu sigue intacta, pero entren soníos nuevos a escena. Pa conocer la intrahestoria d’esti discu, falamos col so alma mater, Jorge Ilegal.
- Echando la vista atrás y tres más de 40 años ¿Qué foi lo que vos motivó a facer un grupu de rock?
Nun nos entusiasmaba lo qu’había y tuvimos que proporcionanos el nuesu propiu entusiasmu.
- ¿Siempre tuvistis un interés pola música o a veces cambió n’interés pol mundu que l’arrodia?
L’interés foi siempre esclusivamente por la música, la música ye lo importante y el mensaxe que va nella, l’envoltoriu ye prescindible ya inclusive atreveríame a dicir qu’intoxicante.
- Con tantos años d’actividá, fixistis munchos conciertos. Mesmamente, esti añu facéis una xira per España onde tocáis en Xixón, una ciudá imprescindible pa la banda, pero onde viviríes noches buenes y otres non tanto. ¿Qué significa Xixón pa vosotros?
Viví en Xixón unos 20 años y enxamás perdí’l contactu cola ciudá. Tanto los grandes momentos, como los díes criminales, que los hai que quieren matate, dieron forma a la mio vida y al de la banda ilegales.
- Falando de conciertos, va poco cantastis na Selmana Grande de Xixón ¿Cómo foi la esperiencia?
Había daqué nel aire que se llevaba bien cola mio voz y la mio guitarra. La banda taba acoplada y la noche foi la nuesa aliada. Producióse esi milagru que siempre tamos buscando.
- Sobre’l nuevu discu «Joven y arrogante» ¿Qué nos podéis cuntar? ¿De qué trata?
Trátase de constantes qu’ arrodien el nuesu tiempu: l’ansiedá, que ye la enfermedá del sieglu XXI, la cuestión social que se toca nun cantar que fala del orfanatu mineru, de la imprescindible arrogancia pa tocar rock, de que ye un crimen el silenciu y qu’hai verdaes incómodes, que nun han callase, de la fugacidá esplosiva de la vida…
¿Qué hai de “joven” y “arrogante» n’Ilegales tres una llarga trayectoria?
La lletra del cantar informa perfectamente de estes cuestiones, diz testualmente:
«Yo era joven y arrogante con escasas cicatrices y la vida por delante, yo era un joven imprudente que corría tras desgracias sin parar en reflexiones ni en consejos de la gente. Si no es tan diferente lo que es de lo que ha sido es que tiempo y experiencia de muy poco me han servido.»
- Unu de los cenciellos d’esti discu nuevu ye “Es ansiedad”, un problema qu’ataca a la sociedá cada vez más. ¿Cómo naz esti cantar?
L’ansiedá ye una perra a la que conozo bien y nun soi quien a evitar.
- Tamién atopamos “El mundo contra ti”. ¿Qué hai detrás d’esta lletra ¿Tien nome y apellíos?
Sí, tien muchos nomes y muchos apellíos. Desgraciadamente, el mundu ta enllenu d’esos peligrosos buenos samaritanos y nos acechen caldía con propuestes nocives.
- Vivir n’Asturies siempre fixo que los cantares s’empaparen de realidaes de la zona, como en “El norte esta lleno de frío”. ¿Hai dalgo d’eso nel trabayu nuevu?
Sí, Orfanato minero ye un cantar que toca’l tema mui directamente. Inspirómela una persona falando de sí mesma, de la so familia, del so orixe. L’ambiente siempre se filtró nos cantares d’Ilegales d’una o otra manera.
- Y llueu del nuevu discu y la xira ¿Qué más planes tien Ilegales?
Tamos nun momentu duce a nivel creativu, amás tenemos al nuesu alcance tolos medios de producción. Muncho se tien que torcer la cosa pa que nun consigamos ufrir dalgo realmente bonu nun futuru próximu.
