XX5 ye’l discu col que Kaotiko celebra’l so 25 aniversariu, una selección de 25 cantares que marcaron el camín de la banda. El grupu visita la ciudá de Xixón esti 15 de marzu faciendo un repás a los grandes ésitos de la so carrera musical y enantes de que xuban al escenariu de la Sala Acapulco con Enemia como banda convidada falamos posao con Jony, el so vocalista, pa conocer les reflexones de tantos años na música.
25 años na carretera. ¿Cuála ye la conclusión si echáis la vista atrás?
Que nun camudaron muncho les crítiques que va 25 años facíemos nes nueses lletres, cantares. Tristemente siguen siendo actuales. Pero 25 años dempués siguimos cola mesma enerxía ya intención de criticar tolo que nun nos gusta al nuesu alredor.
El vuesu grupu formóse nel 2000 ¿Podríeis dicinos cómo se formó? ¿Por qué’l nome Kaotiko?
Tres la disolución de Kaos etiliko, los hermanos Aguayo a les guitarres y Fonta al baxu decidieron siguir nesti mundín y dieron con Xabi a la batería y conmigo a la voz. Escoyer un nome foi relativamente cenciello, los cinco yéramos asina…ordenaos (que nun yera un bon nome)…y Kaotikos!
A lo llargo de la vuesa trayectoria musical, compuxistismás de 100 cantares. Ante esti gran númberu ¿Sedríeisquiénes a describir como ye la vuesa música? ¿Cuáles fueron les vueses influyencies y inspiraciones?
Kaotiko siempre fuimos un grupu con muncha enerxía, cada vez que componemos un cantar imaxinamos col puñu n’altu y soltando tola adrenalina, si tuviéramos que ponenos una etiqueta diríamos que facemos punk rock melódicu.
Grupos como los Ramones, Bad Religion o La Polla Records, fueron grupos que compartimos los cinco.
Dempués de 25 años y tantos cantares fechos ¿Cuál calificaríeis como’l vuesu meyor cantar?
Ye difícil decantase por una, de fechu pue que cada unu escoyéramos una distinta, pero podemos dicir qu’Otra Noche ye’l nuesu cantar más conocíu.
“Otra noche” ye’l cantar más icónicu y que nun pasa de moda. Hai un tiempo que se fixo viral con un videuonde un mozu la cantaba cola policía per detrás. ¿Cuálafoi la vuestra reacción con esa grabación tan graciosa?
Siempres ye un arguyu ver en redes, pela cai, o en cualquier llau, xente escuchando, cantando, faciendo covers o cualquier cosa cola nuesa música. Esi videu consiguió facese viral, paez que la policía sabía de que diba’l cantar (rises). Y al ver el sentimientu que-y echaba’l so intérprete, punxímonos en contactu con él y mandóse-y dalguna qu’otra camiseta como agradecimientu…
El vuesu álbum XX5 tien 25 de los vuesos temes regrabaos y revisitaos ¿Cómo foi’l el procesu de facer esti álbum?
Llargu…yeren munchos cantares y toes teníen que volver ser grabaes, inclusive les grabaes fai non muncho tiempu. Pero queríamos consiguir un soníu homoxéneu y esa yera la manera.
La idea nun yera camudar los cantares, sinón grabalos como lo fadríamos anguaño, queríamos que fuera daqué natural…
Yá anunciastis varios conciertos pa esti añu en distintes partes del Estáu. ¿Teneís más planes en mente de cara al futuru?
Repitir estos XX5 años anteriores, ensayar, tocar les fines de selmana, grabar discos…siguir arrodiaos de bona xente.
