Esti branu, la banda asturiana Alberto & García pónense pintura de guerra col so nuevu adelantu:“Tribu”. El septetu vuelve tar so la producción de Toni Brunet para presentanos el primera single del que va ser el so próximu discu (el so sestu llarga duración).
Tribu ye un cantar qu’esquiza l’aguada roquera del grupu anque nesti casu con grandes pincelaes de Neo-Soul y Pop-rock na que les guitarres eléctriques, vientos y sección rítmica cobren gran importancia. Amás, a nivel sonoru, les reverbs y aburuyes xueguen un papel fundamental a lo llargo de tol cantar y en tolos preseos.
“Tribu” fala de superar y superase énte les situaciones complicaes de la vida, seyan particulares o globales, teniendo en cuenta que siempres ye muncho más fácil facelo en compañía. Al pie de la tribu de cada un de nós. La portada, ye obra del saxofonista del grupu, y artista plásticu, Manuel García (el Nolas) y el videoclip cuerre a cargu del director lleonés Juan Marigorta.
La grabación del tema tuvo llugar nos Estudios Gaua (Fruniz-Bizakia) na primavera de 2022, con Toni Brunet a la producción, y Jon Asier Zubelzu e Iker Villa como asistentes de grabación. La masterización tuvo a cargu de Pablo Schuller en SchullerSound (Valencia).
Tres dos años intensos teniendo tocao por dellos escenarios y festivales de too el país nos qu’Alberto & García publicaron dos discos, “Flores Negras” (Boomerang Discos, 2020) y “Flores en el Campoamor” (Boomerang Discos, 2021), amás de 2 singles el pasáu branu (Río Bravo y Bachata Verde), aprovechen esti nuevo llanzamientu pa siguir de xira. Por eso van tar na Plaza Mayor de Xixón, nuna xira de branu na que tán percorriendo escenarios y festivales de tol estáu español.
