Esti domingu 7 de payares remata la edición 2021 d’Amosando, el ciclu de presentaciones de novedaes discográfiques entamáu por musicasturiana.com, con un formatu ente conciertu acústicu con aforu reducíu, programa de televisión y alderique. Nesta grabación participen la bandina Caldo y Os Rabizos pa presentar el so llibru-CD ‘A Música Tradicional del Eo-Navia’ y el cantautor Toli Morilla, que va interpretar dellos temes n’asturianu de la so carrera y del so nuevu álbum ‘Canciones Transgénicas para el Mundo Mascota’.
Caldo y Os Rabizos ye una bandina tradicional del Eo-Navia qu’interpreta un repertoriu popular procedente de la so fastera. ‘A Música Tradicional del Eo-Navia’ ye’l so primer trabayu, un llibru-discu con 15 pieces nel que se va esplorando l’archivu de tradición musical de les bandines de baille que percorrieron los conceyos que van dende la montaña lucense hasta la zona de los vaqueiros d’alzada y dende la mar hasta la montaña d’Ibias.
Toli Morilla ye’l más veteranu de la xeneración de cantautores posterior al Nuevu Canciu. Con una cuidada propuesta musical qu’entemez el rock acústicu, la canción d’autor y el folk, tien una discografía que se remonta a 1998, que ta formada por ocho referencies tanto n’asturianu como en castellanu y qu’acumula dellos premios. ‘Canciones Transgénicas Para el Mundo Mascota’ ye’l so últimu discu, qu’inclúi dos temes n’asturianu.
Emisiones d’Amosando 2021
Per otru llau, musicasturiana.com acaben d’estrenar el conciertu y la entrevista con Llevólu’l Sumiciu, la última banda participante n’Amosando xunto con Fernando Valle Roso y Silvia Moreno -de los que s’estrenará la so grabación esti mes de payares-.Tamién tán disponibles en YouTube los videos de tolos artistes participantes nesti ciclu qu’entamó en marzu de 2019: L-R, Xaime Martínez, Ún de Grao, D’Urria, Anabel Santiago y Eva Tejedor & Les Pandereteres, Cerezal, Silvia Quesada, Felpeyu, Fruela 757, Bestiariu, Misiva, Carlos Rubiera y José Manuel Tejedor.
Estes actuaciones reflexen la calidá de la música fecha en llingua asturiana amás de la so diversidá, yá qu’estilos como’l pop, indie, electrónica, folk, tonada, canción d’autor y rock suenen nesta iniciativa organizada por musicasturiana.com, realizada por Javi Lueje y patrocinada por Xixón Turismu y Fundación Caja Rural de Asturias y col sofitu de la Fundación Municipal de Cultura y Educación de Gijón/Xixón.
