La Biblioteca Pública d’Asturies Ramón Pérez de Ayala celebra esta selmana l’actu central del programa d’actividaes entamáu pola Viceconsejería de Cultura, Política Llingüística y Deporte al rodiu del poeta asturianu Carlos Bousoño con motivu del centenariu de la so nacencia. Mañana, a les 19:00 hores, ta previstu un homenaxe lliterariu cola intervención de dellos especialistes na obra del autor.
Los catedráticos universitarios Francisco Javier Díez de Revenga, Santiago Fortuño y Gabriele Morelli, xuntu conlos escritores Alejandro Duque Amusco y Eduardo Martínez Rico, van participar nel actu con intervenciones individuales y la llectura de diversos poemes de Bousoño.
Mañana, a les 18:00 hores, tamién se va presentar la edición d’un manuscritu inéditu del autor, Diario de Carlitos, que recueye, en casi 300 páxines, la trescripción de les notes qu’escribió cuando yera neñu en siete llibretes que caltuvo la so vilba, Ruth Bousoño, que va tar nel actu y prologó la publicación. El diariu recueye pensamientos y vivencies dende xunu de 1933, cuando’l poeta tenía 10 años, hasta setiembre de 1936.
El llibru, que rescata esti testu hasta agora non publicáu, ye’l tercer volume de la colección Amiestu, qu’edita la Biblioteca d’Asturies y que busca dar a conocer un conxuntu de testos variaos que son reflexu de la vida cultural del pasáu.
Coles mesmes, el miércoles, a les 19:00 hores, va presentase’l llibru En otro grado de luz: lecturas sobre Carlos Bousoño: llectures sobre Carlos Bousoño, un ensayu d’Alejandro Duque sobre la vida y obra del poeta qu’acaba de publicar la Editorial Renacimiento. L’actu va cuntar cola presencia del autor y d’Abelardo Linares, poeta y editor de la publicación.
Duque axuntó diversos ensayos sobre la personalidá y obra poética del autor y ufierta una semblanza del poeta, hasta agora inédita; una llarga entrevista de calter autobiográficu, amás d’una interpretación de la evolución de la so obra, que percuerre más de 50 años d’inspiráu tratu coles palabres, y el so constante sentíu de busca y esploración de nueves formes.
El programa d’actividaes inclúi una amuesa bibliográfica comisariada por Santiago Fortuño Llorens que percuerre la vida y trayectoria de Bousoño sol títulu Entre el canto y la indagación. La esposición axunta les sos obres poétiques publicaes, amás de los sos trabayos teóricos sobre la espresión poética. Tamién presenta aspectos más personales, con fotografíes, manuscritos, correspondencia y otros oxetos.
L’amuesa va caltenese abierta hasta’l 26 de payares, nel horariu habitual de la biblioteca: de llunes a vienres, de 8:30 a 20:45 hores; sábados, de 10:00 a 13:50 y de 16:00 a 20:45 hores; y domingos y festivos, de 10:00 a 13:50 hores.
