La Biblioteca d’Asturies Ramón Pérez de Ayala va acoyer l’archivu históricu de Radio Asturias. El patrimoniu discográficu d’esta emisora remóntase a 1925, cuando se creó, y supera los 50.000 exemplares, nel so mayor parte discos de 78, 45 y 33 revoluciones per minutu, compactos (CD) y otros documentos sonoros en diversos formatos pertenecientes a estilos de músiques clásiques y populares, editaos na so gran mayoría n’España mientres el sieglu XX. El gruesu de la colección formóse mientres 60 años: dende 1930 a 1990.
El director xeneral de Patrimoniu Cultural, Pablo León Gasalla, va participar mañana, martes, na firma de la entrega provisional del depósitu del archivu xuntu col director de la Biblioteca d’Asturies, Juan Miguel Menéndez; el director xeneral del Grupu Radio Asturias, Rubén Riaño, y el presidente del conseyu d’alministración del grupu, Luis Toyos. L’actu va celebrase a les 12:30 hores nel aula d’actividaes de la biblioteca. A partir d’esti momentu, dirán realizándose socesives entregues de material hasta algamar la totalidá del archivu fonográficu de la emisora.
Radio Asturias quier que les instituciones asturianes, debidamente coordinaes dende l’Executivu autonómicu, reciban en depósitu y de forma gratuita’l patrimoniu fonográficu de la emisora, dáu l’interés históricu, documental, bibliográficu y, polo xeneral, cultural, de los fondos. D’esta miente, la entidá promueve la protección, defensa, caltenimientu, investigación y espardimientu d’esta colección. La Biblioteca d’Asturies Ramón Pérez de Ayala foi la escoyida pal depósitu de los materiales al disponer d’un llugar aparente y de profesionales afayadizos pa realizar les xeres técniques que trai’l so caltenimientu.
