La Biblioteca Municipal «Alfonso Camín» de Roces resultó ganadora del Premiu CCB 2022 na modalidá de biblioteques públiques en poblaciones de más de 10.000 habitantes, col proyectu «No hace tanto»
Supon la mayor reconocencia a nivel nacional
Los premios son convocaos pol Conseyu de Cooperación Bibliotecaria (CCB) que ye l’órganu que canaliza la cooperación bibliotecaria ente les alministraciones públiques, dependiente del Ministeriu de Cultura.
Establécense les siguientes modalidaes: biblioteques especializaes, universitaries y públiques. Nel casu de les biblioteques públiques contémplense dos distinciones, una pa biblioteques públiques en poblaciones d’hasta 10 000 habitantes y otra pa les biblioteques públiques en poblaciones de más de 10 000 habitantes, que recayó na Biblioteca de Roces.
El Ministeriu de Cultura y Deporte estrema con estos premios a los meyores proyectos bibliotecarios, proyectos innovadores yá executaos y desenvueltos n’España, que dean visibilidá a les biblioteques na sociedá y que puedan sirvir como modelos de bones práctiques.
El proyectu «No hace tanto» naz coles mires de recuperar la memoria histórica del barriu de Roces. Foi desenvueltu y coordináu pola Biblioteca Municipal Alfonso Camín de Roces.
El proyectu tresfórmase nun documental a partir de la participación de más de cincuenta persones que quixeron contribuyir a recuperar los sos raigaños y dexar esi testimoniu a xeneraciones futures. Los participantes, na so mayoría, son persones mayores que vivieron la formación del barriu na década de los años 60, lo que supunxo’l tresformamientu d’una zona rural del Conceyu na parte más al sur de la ciudá de Xixón.
El filo narrativu del documental, basáu nel llibru d’unu de los sos vecinos, Sergio Rato, ye interpretáu por neños del barriu a partir d’una campaña de captación de nuevos intérpretes.
Proyectu presentáu nel Cine de Roces énte más de doscientos vecinos que quixeron volver recordar xuntos dalgunes de les sos esperiencies de vida.
Tuvo’l so espardimientu nel restu de la ciudá cola participación na programación oficial como pase especial del 8º Festival de Curtiumetraxes CortoGijón. Escoyíu tamién n’otros Premios como en Rebiun (Rede de Biblioteques Universitaries) y presentáu na Xornada sobro Biblioteca Pública de l’Asociación Profesional d’Especialistes d’Información Apei. El Ministeriu de Cultura y Deporte tien incluyíu’l proyectu nos Llaboratorios Bibliotecarios como exemplu de Bones Práctiques con participación ciudadana.
