La sala d’esposiciones de la Casa la Cultura d’Avilés va acoyer dende mañana y hasta’l 30 de payares la 31.ª edición de la Muestra d’Artes Plástiques del Principáu. La esposición, que va inaugurase a les 19:30 hores, incluye obres d’Andrea Rubio, ganadora del Premiu Asturies Xoven d’Artes Plástiques, y de los creadores asturianos Pablo Casanueva, Sofía Hurtado, Pablo López, Mario M. Martínez; Pablo Pons Heres y Claudia Riesgo.
Andrea Rubio (Mieres, 1990) conecta de forma directa la so obra col so llabor como educadora artística y espresa la crítica al aprendimientu por imposición o l’anestesia pa percibir en delles pieces de fuerte impactu. Nel so trabayu, la didáctica de la espresión plástica ye consustancial al so ensayu sobre’l dibuxu, entendíu como’l placer del propiu movimientu, la buelga dexada al traviés de la lluz o la tinta. El proyectu col que ganó’l premiu Asturies Xoven, empecipiáu mientres una residencia en Llaboral Centru d’Arte y Creación Industrial, incluye fotografíes, cuadernos de dibuxu, papeles de gran formatu, escultures y videocreaciones.
La Conseyería de Presidencia convoca cada añu, al traviés del Institutu Asturianu de la Mocedá y dientro del Programa Culturaquí, la Muestra d’Artes Plástiques, un eventu que pon de manifiestu’l compromisu del Gobiernu d’Asturies col arte xoven. Nel certame participen creadores residentes na comunidá o descendientes hasta segundu grau d’emigrantes, que la so edá nun pase los 35 años. A lo llargo de les sos 31 ediciones fueron escoyíos 292 artistes, dellos convertíos en figures consolidaes del panorama actual
