La conseyera de Transición Ecolóxica, Industria y Comerciu, Belarmina Díaz, empecipió güei un viaxe de dos díes a Bruxeles p’afrontar con responsables de la Comisión Europea les midíes de sofitu a la industria y al sector del aceru, mesmo que les polítiques en materia de competencia y transición xusta. Díaz caltuvo un primer alcuentru de trabayu con miembros del equipu de Teresa Ribera, vicepresidenta executiva de la Comisión Europea y comisaria de Transición Llimpia, Xusta y Competitiva, encabezaos pol so xefe de gabinete, Miguel Gil.
Na xunta, na que tuvo acompañada pol director xeneral d’Industria y Minería, Mauro Rodríguez Piedra, la conseyera afrontó polítiques en materia de transición xusta y descarbonización, ayudes d’Estáu y los planes que ta impulsando la Unión Europea de sofitu a la siderurxa y al sector industrial.
Según señaló Díaz, l’equipu de la vicepresidenta treslladó-y que’l Plan d’Acción sobre l’Aceru y los Metales, que se va facer públicu esti miércoles, va basase en seis pilastres con midíes que la so aplicación va empezar esti mesmu añu, acompañaes de mecanismos d’ayudes d’Estáu, lo mesmo que de paquetes lexislativos de simplificación alministrativa.
La conseyera calificó la xunta de «granible» y treslladó dellos pidimientos del Gobiernu d’Asturies a la Comisión Europea pa reforzar la situación del sector del aceru y de les industries electrointensivas. Ente elles, la estensión del marcu temporal d’ayudes a la guerra d’Ucraína y l’adaptación del mecanismu d’axuste del carbonu en frontera p’ameyorar la so efectividá, «que consideramos bien relevante pa la industria y pal aceru».
Díaz aportunó énte los responsable de la Comisión Europea en que la industria ye «irrenunciable» pal Gobiernu d’Asturies y reclamó «urxencia» na aplicación de les midíes de sofitu al sector polo xeneral, y a la siderurxa en particular.
