La Compañía Asturiana de Comedies concedió a la emisora Cadena SER Xixón el so Premiu Honoríficu del añu 2022, col cual quixo reconocer al llabor de persones y entidaes nel so defensa de la cultura asturiana y del teatru.
L’asamblea de l’asociación cultural llega a esti fallu al considerar qu’esta emisora comercial d’ámbitu local ta siempres abierta a la ciudadanía pa ufiertar una amplia cobertoria de les actividaes culturales públiques y privaes, como asocede cola programación del Teatru Xovellanos y del Teatru Prendes, destacando la so participación como emisora collaboradora del Salón de Teatru Costumista de Candás, y les iniciatives de les entidaes asociatives del conceyu de diversa índole. Entiende que, col so proceder, Cadena SER Xixón confirma con fechos propios l’espíritu de los Premios “Xixón Ciudá Abierta”, qu’otorga añalmente y que fixo recayer na Compañía Asturiana de Comedies nel añu 2000.
L’asociación quixo recordar la estrecha vinculación que l’antigua emisora local EAJ-34, antecesora de Cadena SER Xixón, tuvo nos años 30 del sieglu pasáu col Teatru Popular Asturianu, al traviés del so cuadru artísticu de radioteatru, encabezáu pol llocutor y dramaturgu Manuel Llaneza ya integráu por delles de les figures visibles de les distintes Compañíes Asturianes del momentu, como Antonio Mediu, Quetina Carbayos, José Manuel Rodríguez y Balbina Barrera. El mesmu Eladio Verde debutó dramatúrgicamente con un guión pa la so radiodifusión: Los crímenes del carniceru.
