La conseyera de Derechos Sociales y Bienstar, Melania Álvarez, anunció güei qu’el so departamentu va coordinase coles entidaes del tercer sector y colos axentes sociales pa activar el funcionamientu del Centru de Referencia Estatal para persones con Discapacidáes Neurolóxiques (Credine) de Llangréu.
Anguaño, l’equipamientu solo desenvuelve un programa d’adecuación a la vida cotidiana pa persones que sufrieron un ictus. “Decidimos tomar la iniciativa pa impulsar l’actividá”, sorrayó Álvarez nel plenu de la Xunta Xeneral. “Vamos diseñar, de la mano de les entidaes y los axentes sociales, una propuesta conxunta de posibles usos que vamos treslladar al Imserso para la so valoración”, detalló.
El Credine foi concebíu para facilitar el procesu de transición a la vida normalizada de les persones que carecen trestornos neurolóxicos y ufiertar el sofitu necesariu a la so redolada familiar, pero nunca llegó a poner en marcha al cien per cien los sos servicios. Énte esta situación, el titular de Derechos Sociales amosó la so intención de “esplorar toles posibilidaes, con cuenta del centru optimice los recursos disponibles”.
Esti plan tamién va ser, en palabres de Melania Álvarez, “un revulsivo non solo pa impulsar el nuevu modelu de cuidos de llarga duración, sinón tamién pa crear nuevos puestos de trabayu nes cuenques mineres y, amás, asitiar población”.
