El paru rexistráu xubió n’Asturies en 6.342 persones (+ 8,19 %) mientres el mes d’abril. La paralización d’una parte sustancial de la economía de resultes de la crisis sanitaria asitió’l paru en 83.793 demandantes, niveles desconocíos dende va trés años. Dende xineru de 2009 nun se algamaben medríes mensuales del paru rexistráu percima del 8 %.
Les cifres publicaes pol Ministeriu de Trabayu reflexen que’l paru xubió n’abril n’Asturies en tolos sexos, en tolos tramos d’edá y nel conxuntu de sectores económicos. Sicasí, les crecederes fueron superiores ente los homes (+10,84 %), les persones de 25 a 45 años (+11,01 %) y nos servicios, que contabilicen 4.724 demandantes nuevos d’empléu; esto ye, cuasi 75 de cada 100 paraos recién.
El comerciu minorista, hostelería y hotelería, servicios d’empléu o educación concentren les xubíes más relevantes. Tamién se rexistraron aumentos percima de la media rexonal na industria (9,71 %) y la construcción (12,12 %). Nos servicios rexistráronse medríes importantes nel comerciu al por mayor y al por menor (608 persones), actividaes rellacionaes cola hostelería (1.025 persones más) y actividaes rellacionaes col empléu (432 persones), l’alministración pública y la educación (775).
Evolución por conceyos
De les trés grandes ciudaes asturianes, Xixón y Uviéu rexistraron una medría llixeramente percima de la media rexonal. N’Avilés, la xubida del paru asitióse perbaxo. Tamién nos conceyos próximos a estos trés grandes núcleos urbanos constátense xubíes percima de la media, sacante en Siero, Noreña y Villaviciosa. Tocante a los conceyos de tradición minera, Llangréu, Mieres, Samartín del Rei Aurelio, Llaviana y Ḷḷena rexistraron medríes perbaxo de la media de la comunidá. Tocante a les ales de la comunidá, la situación foi desigual. El paru creció perbaxo de la media en Valdés (+5,85 %) y percima del promediu en Llanes (+ 9,29 %) y Ribeseya (+ 10,45 %).
La incidencia de la crisis sanitaria tamién se manifiesta na evolución de la contratación, anque a pesar del confinamientu y el parón de la economía xestionáronse empleos nuevos. En concreto, rexistráronse 7.228 contratos, 11.676 menos qu’en marzu y 24.365 menos que’l mesmu mes del añu anterior.
Los efectos de la pandemia son más relevantes si se comparen les cifres del desempléu rexistráu coles d’abril del añu pasáu. Asina, el paru aumentó’l 15,81 %, lo que supón 11.437 desocupaos más que va dolce meses y medríes bien notables en sectores como la construcción (+ 22,78 %), la industria (27,47 %) y los servicios (+ 17.15 %), en tolos casos percima de la media autonómica.
Otra manera, el númberu d’afiliaos a la Seguridá Social baxó n’Asturies en 8.529 persones n’abril, un 2,37 %, hasta asitiar en 350.997, 13.439 menos que va un añu.
