La Empresa Municipal d’Agües (EMA) continúa la execución de les obres del depósitu d’agua de tormentes del parque d’Hermanos Castro. La decisión tómase, por resolvimientu d’alcaldía, al considerase “una obra esencial pal sistema de depuración d’agües residuales de Xixón”. Nel momentu de la suspensión d’estes obres pol decretu d’alarma, la empresa axudicataria Acciona atopábase trabayando na segunda fase del encruz del ríu Piles. Estos trabayos realízense en terrenes de dominiu públicu marítimu terrestre y nun pueden llevase ente’l 1 de xunu y 30 de setiembre. L’actual suspensión obligaría, por tanto, a atayar les obres mientres los meses de branu y a aplazar el so finalización hasta, siquier, el mes d’ochobre.
Les consecuencies d’esti aplazamientu aumentaríen el riesgu de que la zona de trabayu pudiera trate afectada por envernaes marines o crecíes; el tiempu d’afección natural nesa zona; el riesgu d’impactu medioambiental a la sablera de San Llorienzo en temporada de baños; y retrasaría la reurbanización de l’avenida del Molinón, dependiente de la finalización d’estos trabayos. Poles graves consecuencies que la paralización d’estos trabayos tendría, tanto dende’l puntu de vista técnicu, como social y medioambiental, el Conceyu de Xixón considera que la so calificación de “esenciales” pa que puedan siguir ta “sobradamente xustificada”.
