La startup va desenvolver pa la compañía ICCS Contact un comparador d’ufiertes online de los servicios más demandaos.

La empresa asturiana Táctica Tic foi una de les ganadores del programa estatal Ances Open Innovation, que falló esta mañana los sos premios anuales nuna gala online. La compañía, que tamién llevó un gallardón l’añu pasáu, presentó una propuesta al retu llanzáu pola compañía ICCS Contact.

El proyectu distinguíu ye’l desenvolvimientu d’un comparador d’ufiertes online de los servicios más demandaos: enerxía, telecomunicaciones, seguros, servicios bancarios y alarmes, ente otros. Son nueve les empreses innovadores premiaes, qu’agora van establecer un contactu colos diez grandes compañíes participantes nesta edición.

Ances Open Innovation ye una iniciativa de l’Asociación Nacional de Centros Europeos d’Empreses y Innovación, baxo la coordinación de Cristina Fanjul, directora de CEEI Asturies, que busca poner en contactu a empreses emerxentes (startups) con firmes tractores que busquen soluciones a retos tecnolóxicos. Esti programa val de plataforma pa que compañíes innovadores puedan dar el saltu definitivu gracies a la so collaboración coles tractores.

Na gala celebrada güei participaron les 28 startups que llegaren a la final, ente les que s’atopaben cuatro asturianes: Táctica Tic, Iknovatio, Origen Solutions Estudiu y Immersive Oasis y la Fundación Idonial. Toes elles presentaron soluciones a los retos d’innovación llanzaos por Aceites Maeva, CL Grupo Industrial, Grupo ACOPO, ICCS Contact Center y Mundiplan.

Amás de Cristina Fanjul, al actu tamién se sumó l’altu comisionáu pa la España Nación Entamadora, Francisco Polo.