La multinacional británica Crimtan Holdings Ltd, especializada en publicidá y mercadotecnia dixital, anunció güei la so implantación n’Asturies, dende onde va dirixir los sos planes d’espansión nel mercáu nacional y la so crecedera nos países del sur d’Europa.

La compañía va desenvolver les sos actividaes pa España dende’l centru empresarial La Pipa, en Xixón, al traviés de la filial Crimtan Esp S.L. constituyida n’avientu. Primeramente preve crear 13 puestos de trabayu coles mires de llegar a 24 empleos nun plazu de trés años con una plantiya especializada en publicidá programática, analítica, ciencia de datos ya intelixencia artificial.

El proyectu foi presentáu esta mañana nun actu públicu presidíu pol conseyeru d’Industria, Enrique Fernández, nel que tamién participaron Paul Goad, CEO (conseyeru delegáu) de Crimtan y dellos responsables de la compañía, Alex Lawton, promotor del ecosistema tecnolóxicu La Pipa, según la directora xeneral del Idepa, Eva Pando.

La implantación de Crimtan n’Asturies ye’l décimu primer proyectu que recala n’Asturies frutu de la Estratexa d’Atracción d’Inversiones puesta en marcha pola Conseyería d’Industria, Empléu y Promoción Económica pa desaniciar los efectos de la pandemia ya impulsar la reactivación de la economía.

La estratexa ta coordinada pol Idepa (Institutu de Desenvolvimientu Económicu del Principáu d’Asturies) ya impleméntase como una actuación de collaboración público-privada con participación de les Cámares de Comerciu, la Federación Asturiana d’Empresarios (Fade) y los think tanks Compromiso Asturies XXI y Asturies Power.

Cola implantación de Crimtan la estratexa suma un volume d’inversión captada cercanu a los 200 millones con una estimación de 722 puestos de trabayu, la mayor parte d’alta cualificación nos sectores TIC, inxenieríes y la salú.

El conseyeru d’Industria manifestó’l so prestu pola implantación de Crimtan n’Asturies, una decisión que, al so xuiciu, confirma que’l Principáu ta convirtiéndose nun polu d’atracción d’inversiones con gran potencial n’ámbitos como les TIC. Destacó les posibilidaes de crecedera de la compañía y les oportunidaes que se van abrir pa la creación de nuevos empleos en perfiles técnicos d’altu valor añedíu.

Dende Asturies, Crimtan va apurrir una gama de servicios rellacionaos con publicidá dixital qu’inclúin display, vídeu, publicidá nativo, esteriores y publicidá en televisión conectada. Según los planes de la compañía, dende Asturies va contactar directamente coles empreses pa les qu’empreste servicios publicitarios. El so principal perfil de veceru son les empreses de turismu y comerciu electrónicu minorista.La empresa tien como oxetivu a dos años emprestar serviciu en tol territoriu nacional y espandise dende entós al sur d’Europa a partir del so centru d’Asturies.

Anque primeramente preve la creación de 24 puestos de trabayu en 3 años, nel casu de que lleve a cabu l’apertura d’oficines satélite en Madrid y Barcelona, la compañía señaló que la inversión y el númberu d’emplegaos van aumentar de manera considerable.

Pa ello, yá ta trabayando cola Universidá d’Uviéu coles mires de crear programes de formación en publicidá programático, analítica, ciencia de datos ya intelixencia artificial, según desenvolver programes de formación p’atender les necesidaes futures de personal.

La compañía va tener la so see en Xixón y va trabayar cola axencia Remotive emprestando serviciu a axencies con see en Madrid y Barcelona y va evolucionar pa dar serviciu tamién a editores online locales. El so allugamientu na see de La Pipa ye frutu de los alcuerdos de collaboración suscritos coles empreses asturianes Bedrock Humanised Intelligence y Remotive, dambes con see nesti espaciu, col soporte siguíu del Idepa.