Tamos viendo nestos últimos meses como, dempués de más de cuarenta años, entamóse’l debate na Xunta Xeneral del Principáu d’Asturies sobre la oficalidá del asturianu y del gallego-asturiano, un debate que trespasó llendes y ye mas debatío nos medios de comunicación que nel propiu parllamentu.
Cada día que pasa, asistimos nos medios asturianos y nos medios xeneralistes del estáu español a una montonera de crítiques de pseudo-llingüistes. Xente esperto en otres delles xeres que nada tienen que ver cola llingüística nin cola lliteratura asturiana, xente de melecina, derechu y otres disciplines, xente que nun tienen nenguna rellación nin con Asturies nin cola so cultura. Estes persones falen (ensin saber) de les llingües d’Asturies, dando-y un calter cuasi ficticiu, con dellos dialectos y dalgunos llegando hasta negar la so esistencia a lo llargo de la historia.
Ye ablucante ver como la llucha escontra un derechu que ta recoyíu en delles llexisllaciones estatales ya internacionales va medrando cada día más, averando la demanda social de la oficialidá del asturianu y del gallego-asturiano a un nacionalismu, llegando a dicir que n’Asturies “ta creciendo un xigante”. La reclamación que se vien faciendo nun tien nada que ver con nacionalismos nin secesionismos, lo único que se ta demandando ye que les llexisllaciones tomen una reforma que reconoza los derechos llingüísticos d’estos falantes d’una llingua milenaria.
Como pudo vese col sofitu del diputáu de Foro Asturies, Adrián Pumares, a la reforma del estatutu qu’incluya esta reconocencia hestórica, queda claro qu’esti debate (qu’enxamás tendría que ser motivu d’ello) nun ye daqué d’ideoloxíes polítiques, nun ye una xera d’izquierdes nin de dereches.
Ye por ello polo que, ensin dexar pasar más tiempu, la Xunta Xeneral tien qu’aprobar la oficialidá de les llingües propies d’Asturies. Son 27 los diputaos necesarios pa l’aprobación de la reforma y son 27 los diputaos que tan a favor nel parllamentu asturianu. La única opción posible pa caltener una parte de la cultura de nueso ye cola reforma del estatutu d’autonomía asturianu.
Llegó la hora; chegou el hora. Oficialidá.
