El conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico, anunció güei que la llicitación del proyectu pa la construcción de 250 viviendes d’alquiler asequible destinaes preferentemente a menores de 35 años na parcela de peritos, en Xixón, va empecipiase’l próximu mes d’avientu. L’actuación va realizase sobre una superficie de 11.103 metros asitiada na cai Manuel Llaneza.
Zapico fixo estes declaraciones mientres un alcuentru con mozos, nel Conceyu de Mocedá de Xixón pa falar de les polítiques y los proyectos que’l Gobiernu d’Asturies preve desenvolver coles mires de facilitar a esti colectivu l’accesu a una vivienda digna y afayadiza.
El conseyeru esplicó que’l procedimientu alministrativu va empecipiar cola llicitación del derechu de superficie que va dexar materializar estos pisos, que’l so aprecio d’alquiler afitóse nun máximu de 8,5 euros el metru cuadráu, magar s’estableció una clausa pola que se va puntuar a favor d’aquellos licitadores qu’ufierten un preciu a la baxa. Tamién destacó que los pliegos rectores establecen garantía xurídica y que se modificaron “p’asegurar que prácticamente toles empreses asturianes tean en condiciones técniques de poder participar nel concursu”.
Les obres van suponer xuna inversión total de 44 millones, de los que 8,9 son fondos del Mecanismu de Recuperación y Resiliencia xestionaos pol Ministeriu de Tresportes, Movilidá y Axenda Urbana, y los 35 restantes, al tratase d’una collaboración públicu-privada, apurrir el superficiario por aciu la concesión de derechos de superficie por 70 años. Ese superficiariu va encargase de la construcción, promoción y caltenimientu de les viviendes, siempres supervisáu y controláu pol Gobiernu del Principáu.
El proyectu, que la so finalización ta prevista pa xunu de 2026, inclúi tamién la construcción de 411 places de garaxe, según la instalación d’una mediana superficie nos 2.331 metros cuadraos destinaos a locales comerciales.
La promoción contempla trés tipos de viviendes atendiendo al so tamañu: 144 van tener una superficie media de 46,38 metros cuadraos; 100 van cuntar con 57,07 metros cuadraos, y los seis restantes, 75,54 metros cuadraos.
