La Peral refuga los cambeos na llinea 18 d’autobús

0
635

Los cambeos na llínea 18 d’autobús nun convencen a los vecinos de La Peral, Perchera y La Braña. L’Asociación vecinal Santiago tien convocaes pa esta tarde delles concentraciones de refugu escontra les modificaciones previstes nel percorríu pel barriu de la llínia d’Emutsa. La convocatoria ye de magar les 19 hores nes paraes de la cai Torrecerredo y Sierra del Aramo.

El colectivu vecinal valora la necesidá de faer cambeos pa dar serviciu a Santa Bárbara, pero ensin perxuiciu a los «vecinos qu’usen el tresporte públicu». Llamenten que d’esta manera, se dexe ensin serviciu a La Braña y a toles viviendes de la cai Peña de los Cuatro Xueces. «Tamién se dexa ensin parada de referencia a la población de Perchera pa baxar al centru, teniendo que treslladase hasta la cai Peña Santa de Enol», señalen nun comunicáu de prensa.

L’asociación entiende que los cambeos nel percorríu va xenerar problemes d’aparcamientu y na circulación del tráficu. Critiquen que nenguna de les propuestes que treslladaron al Conceyu foi tenida en cuenta. «Tresllademos hasta cuatro propuestes distintes pa dar serviciu a la población de Santa Bárbara y siempres nos dixeron que nun son vidables». Llamenten que tolos cambeos se concentren na mesma zona y esclarien que «hai opciones pa dar el serviciu ensin que los derechos a la movilidá de la población veanse afectaos».