El Gobiernu d’Asturies celebra l’impulsu a les primeres obres del plan de víes de Xixón, a les que se dio lluz verde güei nel conseyu d’alministración de la sociedá Xixón al Norte. Tal que propunxera’l gobiernu, la primer actuación va ser la remodelación de la contorna urbana de la cai de Carlos Marx, que va suponer una inversión global de 53,5 millones.
El conseyeru de Movilidá, Cooperación Local y Xestión d’Emerxencies, Alejandro Calvo, destacó la importancia d’esti pasu: “Supón l’entamu del tresformamientu del Solarón, con un proyectu que va camudar radicalmente’l dibuxu urbanu y la movilidá de la ciudá”.
Amás, Calvo sorrayó l’intensu llabor técnicu llevaáu a cabu nel últimu añu pa facer realidá los proyectos d’esta primer fase coles mires de llicitalos nel primer trimestre de 2026. “El Gobiernu d’Asturies implicóse p’articular soluciones que nos dexaren avanzar y llegar equí colos deberes fechos. Asina vamos siguir trabayando xunto con Adif, el ministeriu y el conceyu, porque somos conscientes de que Xixón y Asturies merecen qu’esi proyectu básicu de la estación intermodal seya una realidá”, remarcó.
Una inversión de 53,5 millones
La primer fase d’actuaciones supón una inversión global de 53,5 millones, de los cualos Adif va asumir n’esclusiva 12,9 correspondientes al pozu d’encruz del colector principal que forma parte de la conexón col metrotrén. Tocantes a los 40,5 millones restantes, Adif va financiar el 50%, mientres que’l gobiernu y el conceyu van asumir caún un 25% ente los años 2026 y 2028.
Les actuaciones previstes nesti primer períodu inclúin la baltadera del viaductu de la cai Carlos Marx y del pasu inferior asitiáu so la estructura, mesmo que la reposición de la cai en superficie, que va conectar l’avenida José Manuel Palacio Álvarez, hasta la glorieta de la cai Carlos Marx, cola avenida de Portugal. Amás, habrá una nueva glorieta ente les cais Carlos Marx y Sanz Crespo, que darréu va dar continuidá a esta postrera. Tamién se va reordenar la glorieta de l’avenida José Manuel Palacio Álvarez, dando continuidá a toles cais llaterales que conflúin nella. Esti nuevu viariu urbanu dexa ameyorar l’accesu a la estación provisional de l’avenida de Sanz Crespo.
Tamién se va encarar la sustitución de dos colectores de saneamientu de gran diámetru que pasen pela redoma de la estación actual per un únicu colector de gran sección. El proyectu inclúi, amás, la execución na cai Carlos Marx de les ramples del futuru aparcamientu y l’adecuación de la llosa de cubrimientu del tanque de nubes asitiáu na avenida José Manuel Palacio Álvarez pa dexar el pasu de vehículos. Finalmente, va instalase moblame urbanu nos nuevos viales, de la que Adif va encarar la execución del pozu necesariu pa la futura conexón col metrotrén.
Per otra parte, mientres la xunta tamién s’afrontó’l desenvolvimientu urbanísticu de la zona, énte’l pidimientu del Principáu y del conceyu d’amenorgar la edificabilidad nun nuevu diseñu al rodiu d’un gran parque. L’órganu analizó la propuesta ellaborada por una firma especializada como entamu de los trabayos que van conformar el futuru desenvolvimientu urbanísticu del Solarón.
