La Estaya de la Llingua y el Conceyu d’Avilés en collaboración con Reciella Families pol Asturianu entamaron va dellos meses una bona propuesta pa los más mozos de la casa, pa la reciella. El proyectu tien por nome “La reciella de la Factoría (na rede) 2021” y trátase de representaciones teatrales pa neños un sábadu al mes, dientro de les sos campañes de normalización de la llingua asturiana. Enantes del andanciu, esti ciclu facíase dientro de les programaciones de la Factoría Cultural d’Avilés.
Les representaciones, d’alredor de 45 minutos tán disponibles na canal de Youtube de PlayPresta, otru de los collaboradores d’esta programación. Les obres que se representen nesti ciclu foron premiaes en dalgún casu, polo que la so calidá ye perbona. El viaxe de Covaletti, interpretada por Higiénico Papel Teatro, algamó’l premio OH! de les Artes Escéniques d’Asturies 2014 al meyor espectáculu infantil.
Les representaciones yá estrenaes pueden vese calcando nesti enllaz nel momentu que se desee, pero aínda queden dos por estrenar:
- El 18 d’avientu a les 11 hores va estrenase “Nun me presta”, d’Olga Cuervo. Trátase d’un cuntacuentos perespecial, na que la protagonista nun quier ser princesa, nun quier ponese vestíos, y nun-y presta que nun-y tomen atención.
- El 8 de xineru del añu 2022 llega “Güelina, d’Ana Morán. Un cuntacuentos nel qu’una güela máxica, que tien munchos años y cuasi venti nietos a quienes da ciñu ensin fin. ¿Cómo ye que sigue teniendo tanta fuercia pa llogralo?
