El proyectu Al son del cantar yá tien ganadores de la edición 2021/2022. Nesta convocatoria participaron centros educativos de primaria y secundaria de los conceyos de Cuaña, Navia, Grandas de Salime, Xixón, Cangas del Narcea, Grau, Nava, Sariegu, Ḷḷena, Gozón, Carreño y Castrillón, convocaos polos Servicios de Normalización Llingüística de los conceyos mentaos.
Trátase d’un proyectu en forma de concursu musical pa los cursos de cuartu, quintu y sestu de Primaria y primeru y segundu de la ESO, que quier estimular l’aprendizaxe del alumnáu al traviés de la investigación, el descubrimientu y la creatividá nel campu de la música. El oxetivu ye que los estudiantes presenten una canción con lletra n’asturianu o eonaviegu escrita por ellos mesmos, sobre una melodía tradicional o sobre una melodía tamién orixinal y propia.
El xuráu estima la implicación de los centros, la orixinalidá de les propuestes y la tresversalidá que munchos centros consiguieron col proyectu, implicando a bona parte del profesoráu de distintes asignatures. Reconozse amás, como aspectu mui positivu, la participación de distintes etapes educatives, dende primaria a la ESO.
Los centros ganadores nesta edición son:
- CPEB El Salvador (Grandas de Salime), con El mañá das grandalesas
- CP Darío Freán Barreira (Cuaña), con Xantar
- IES Cangas del Narcea (Cangas del Narcea), con Cantu a les muyeres
- CRA Lena (Ḷḷena), con La madreña de mio güela
- CP Virgen del Fresno (Grau), con Les fiestes del añu
- CP San Félix (Carreño), con ¿Quién será?
- CRA Cabu Peñes- San Jorge (Gozón), con Protesta animal
- IES Peñamayor (Nava), con ¡Ye que me presta tanto!
- CP Salvador de Vega Berros (Sariegu), con Gárrate bien fuerte
- CP Ramón de Campoamor (Xixón), con Marineru
El proyectu entra agora na segunda fase, na que les composiciones ganadores van ser versionaes por grupos profesionales poniendo’l so sellu personal y ofreciendo un resultáu que va poder recoyese nun CD.
La Conseyería de Cultura, Política Llingüística y Turismu collabora nel proyectu faciéndose cargu de la producción del discu y de la gala onde se van interpretar les canciones ganadores en directo y que se va facer en mayu del año 2022.