La muestra Un lugar perfecto. Catástrofe en unos cuantos actos, de l’artista y diseñadora Elisa Cuesta, va poder visitase a partir de mañana a les 19:30 hores na Sala Borrón d’Uviéu. La obra, que se centra na integración de la tecnoloxía na sociedá y la naturaleza, cuestiona la función de les grandes multinacionales de la tecnoloxía y los servicios.

La directora xeneral de Moceda, Diversidá Sexual y Derechos LGTBI, Clara Sierra, va inaugurar mañana la muestra, que va tar abierta al públicu hasta’l 17 d’avientu y va cerrar la temporada 2021 nesti equipamientu cultural.

Elisa Cuesta (Sotu’l Barcu, 1992) ye graduada en Diseñu Industrial y Belles Artes pola Universidá Nebrija (Madrid) y anguaño cursa un máster n’Investigación Artística na Real Academia d’Artes de La Haya. El so trabayu aborda, dende una visión crítica, cuestiones d’actualidá como’l valor de los datos, les infraestructures d’información y el diagrama como ferramienta d’especulación y xeneración de conocimientu.

L’artista espuso nel Muséu de la Ciencia y Tecnoloxía de Belgrado, la Galería Cervantes (Belgrado), Science Gallery de Dublín, la galería Quartair (La Haya), LlABoral Centru d’Arte y Creación Industrial, Sala d’Arte Xoven de Madrid y la Sala Borrón. Tamién foi reconocida col Premiu Asturies Xoven d’Artes Plástiques 2019 y el XI Premiu Los Bragales.

Amás de la so producción artística, Cuesta coordinó y produxo iniciatives que vinculen l’arte, la ciencia y la cultura dixitales como’l Festival Tentacular (Matadero Madrid) o la Muestra d’Arte Audiovisual Madatac (Madrid). Tamién foi diseñadora gráfica en Medialab-Prado, el llaboratoriu ciudadanu de Madrid, y participó na puesta en marcha del proyectu colectivu AIDI, qu’impulsa práctiques de diseñu, investigación ya innovación basaes en procesos collaborativos.