La Sala Borrón d’Uviéu acueye dende mañana y hasta el próximu día 28 de xunetu l’amuesa Bon Voyage! Pintura, cerámica y escultura de la Escuela Municipal d’Artes Plástiques y Escéniques del Conceyu d’Uviéu, na que participaron 340 alumnes y alumnos del centru.
La esposición ta estremada en dos fases: la primera, hasta’l próximu 12 de xunetu, inclúi la obra pictórica del alumnáu de la escuela, mientres que la segunda fase abre les sos puertes el 14 de xunetu colos trabayos de cerámica y escultura. La tema de partida pa tolos niveles y árees y l’exa central de l’amuesa foi’l viaxe como elementu activador del interés y de la capacidá de plasmu énte lo que nos arrodia.
Na área de pintura, los alumnos de mayor edá llevaron a cabo interpretaciones y creaciones d’obres personales al rodiu d’esta propuesta y plantegaron viaxes interiores, paisaxes de la memoria, de la fantasía, de la ensoñación, cascaes de semeyes almacenaes, souvenirs de coleccionista ensin alma o postales manipulables d’intres d’esperimentación creativa.
Colos alumnos de menor edá, preparóse xuna instalación tomando como elementu unificador y de soporte creativu xuna senciella chancla de cartón, un calzáu que nos lleva al a idea de viaxe de prestar, tranquil, risonderu ya informal. Los pies de los más pequenos, pasu a pasu, amuésennos la so maxa creativo.
Tool alumnáu, d’ente 4 a 87 años, de la área de Cerámica y Escultura participa nun proyectu común: una instalación realizada con distintes pastes cerámiques ensin colorear. Decenes de páxaros escolguen d’una estructura de madera como evocación poética de la tema propuesta. Coles mesmes, l’alumnáu de mayor edá espón una obra individual cola que, dende distintes espresiones y actitúes, cavilguen avera del viaxe.
La esposición, que s’inaugura mañana a partir de les 19.30 hores cola presencia del director xeneral de Mocedá, Diversidá Sexual y Derechos LGTBI, Marcos Torre, podrá visitase de llunes a vienres ente les 11:00 y les 14:00 hores, n’horariu de mañana; y ente les 17:00 y les 21:00 hores, en xornada vespertina.
