La Sala Borrón acueye Tránsitos, un proyectu plásticu y sonoru de l’artista asturiana Ivana Castañón. La directora xeneral de Mocedá, Diversidá Sexual y Derechos LGTBI, Clara Sierra, va inaugurar mañana a les 19:30 hores l’amuesa, que va poder visitase hasta’l 1 d’abril, y que forma parte del programa d’esposiciones de mozos artistes del Principáu p’anguaño.
Tránsitos, que’l so exa conceptual articúlase al rodiu de la esperiencia personal de la mesma autora respecto al xéneru, qu’entemez la fotografía col arte audiovisual y la música como vehículos d’espresión artística.
Ivana Castañón (Uviéu, 1995) ye graduada en Filosofía y Socioloxía pola Universidá d’Uviéu y cursó los másteres n’Estudios de la Ciencia, la Tecnoloxía y l’Innovación y en Formación del Profesoráu. Tamién realizó cursos de pianu, viola, fotografía y cerámica ente otros.
La moza artista participó en diversos proyectos espositivos y musicales. Asina, collaboró cola Orquesta Sinfónica del Principáu d’Asturies (OSPA) nun trabayu sobre’l compositor Modest Músorgski y participó nel CD Deploy your senses Vol. II (2013). Tamién amosó la so obra na Escuela d’Arte d’Uviéu, l’Espaciu Cultural Atriu de Madrid y el CISLAN de Llangréu. Coles mesmes, protagonizó’l monólogu teatral propiu Malina. En 2018 llogró’l premiu Sexualidaes y el so proyectu de videoarte Fem-dom llogró’l galardón Astragal contra la violencia sexista convocáu pola Conseyería de Presidencia en 2019.
Destaquen tamién los sos trabayos Equí siempres, curtiumetraxe documental dirixíu por Álvaro Gómez-Pidal y del que Castañón foi productora; Fame, pieza de videoarte empobinada por ella, y Galatea, cola que llogró’l premiu Nuevos Realizadores Contra la Violencia Sexista. En 2020 trabayó en La venus de les pieles, performance con videoinstalación.
