La sala de la planta baxa de la see de Presidencia onde se caltien el moblame del despachu de Belarmino Tomás va llevar el nome del políticu que presidió’l Conseyu Interprovincial d’Asturies y Llión (avientu de 1936 – agostu de 1937) y el Conseyu Soberanu d’Asturies y Llión (agostu – ochobre de 1937). El Conseyu de Gobiernu, a propuesta del presidente, Adrián Barbón, adoptó güei esta decisión en memoria de Tomás, nacíu’l 29 d’abril de 1892 y fináu el 14 de setiembre de 1950.
L’artículu 18.3 de la Llei del Principáu 1/2019, pa la Recuperación de la Memoria Democrática, otorga especial relevancia a los integrantes del Conseyu Interprovincial y del Conseyu Soberanu d’Asturies y Llión. Nesti sen, establez que la forma en que tien d’amosase esa reconocencia va desenvolvese reglamentariamente, de tal manera qu’eses persones reciban un tratu análogu al que s’espacha a quien formaron parte de los distintos gobiernos autonómicos. Magar ese desenvolvimientu reglamentariu entá nun se concretó, l’Executivu considera procedente la reconocencia honorífica a Belarmino Tomás.
Primeramente, el 9 d’abril de 2021, el Conseyu de Gobiernu alcordó dar el nome de cuatro expresidentes a otres tantes estancies del palaciu de la Presidencia: Rafael Fernández, Pedro de Silva, Sergio Marqués y Vicente Álvarez Areces.
