Más de 50.000 menores d’hasta 16 años van tener accesu a partir del próximu añu a les prestaciones del programa de salú bucodental d’Asturies. La Conseyería de Salú decidió ampliar esti serviciu, qu’hasta agora s’emprestaba a la población de 6 a 14 años, a la franxa d’edá de cero a seis y a los mozos de 15 y 16 años.
La población infantil menor de 6 años ta formada n’Asturies por cerca de 33.700 neños y neñes. Pela so parte, na comunidá viven unos 16.500 adolescentes de 15 y 16 años. Dambos grupos van poder beneficiase a partir de 2024 del ampliu programa d’atención bucodental del Serviciu de Salú del Principáu (Sespa).
La conseyera Concepción Saavedra ufiertó estos datos nel centru de salú de Llugones, nel que s’anovaron los dos sillones del área dedicada al programa bucodental col fin de ganar n’eficiencia. Tamién participaron na visita’l director d’Atención Sanitaria y Salú Publica del área sanitaria IV, José Antonio Vecino, y l’alcalde de Siero, Ángel García.
El serviciu bucodental na rede pública de primaria inclúi anguaño les siguientes prestaciones gratuites pa la población diana:
– Tratamientos remineralizadores con flúor nes mancadures iniciales de dientes de lleche y definitivos.
– Selláu de fisures.
– Empasties en cualquier diente definitivu.
– Endodoncies en dientes definitivos pa les cohortes iniciales del programa.
– Llimpieces pa la prevención y tratamientu de les fases d’entamu de les enfermedaes xenxivales.
– Iniciatives d’educación pa la salú oral nos centros d’Infantil y Primaria, al traviés del proyectu La conquista de la boca sana.
– Revisiones, llimpieza y fluoración a muyeres embarazaes.
Amás, a les persones con discapacidá intelectual ufiértense-yos los mesmos tratamientos qu’a la población infantil nuna unidá específica allugada nel Hospital Monte Naranco d’Uviéu.
L’ampliación de servicios diseñada por Salú va dexar incorporar progresivamente a nueves franxes de población que se van beneficiar d’atención bucodental: la cohorte d’edá de 17 años en 2025 y la de 18, en 2026. Una vegada completáu esti procesu, va llegar a más de 136.000 menores.
Per otra parte, a partir de 2024 tamién se va emprestar asistencia a persones con discapacidá limitante de movilidá de los brazos que-yos torgue un correctu autocuidáu bucal, mesmo qu’a pacientes oncolóxicos de cabeza y pescuezu. Estos postreros van tener accesu a un circuitu preferente qu’inclúi revisiones, llimpieces y fluoraciones, previes a la radioterapia.
